Ադրբեջանը ստիպված է լինելու վերադառնալ բանակցային սեղանին, որովհետև այլընտրանք չկա. Է. Նալբանդյան

Այսօր Ազգային ժողովում հարցուպատասխանի օր էր, երբ պատասխանելու հերթը հասավ Արտաքին գործերի նախարար էդվարդ Նալբանդյանին ԱԺ պատգամավոր Խաչատուր Քոքոբելյանը հետաքրքվեց, թե չի կարծո՞ւմ, որ պատերազմ վերսկսելու հիմնական պատճառներից մեկն էլ ռուսական կողմից Հայաստանին տրամադրվելիք ռազմական տեխնիկայի ուշացումն էր, որից օգտվեց Ադրբեջանը:

«Ադրբեջանի սանձազերծած պատերազմն առաջին հերթին նրա պատճառով էր, որ Ադրբեջանը ձախողվեց բանակցություններում: Այն, ինչ-որ փորձում էին ադրբեջանցիները՝ իրենց համար բարենպաստ իրավիճակ ստեղծել բանակցային սեղանի շուրջ, բացարձակապես չստացվեց, որովհետև գիտեք, որ բանակցությունների համար հիմնախնդրի կարգավորման հիմնական փաստաթղթերը եռանախագահող երկրների՝ միակ միջազգային մանդատ ունեցող երեք երկրների նախագահների մակարդակով արված 5 հայտարարություններն են, որոնց մինչև հիմա Ադրբեջանը չի ուզում հղում կատարել և ձևացնում է, թե տեղյակ էլ չէ, թե խոսքը ինչի մասին է, կամ բավականին աղավաղված ներկայացնում է փաստաթղթերը, որոնք եղել են աշխատանքային փաստաթղթեր»,-ասաց նախարարը:

Էդվարդ Նալբանդյանը նշեց, թե իհարկե Ադրբեջանը ստիպված է լինելու վերադառնալ բանակցային սեղանին, որովհետև այլընտրանք չկա. «Չկա համաշխարհային պատմության մեջ մի կոնֆլիկտ կամ պատերազմ, որից հետո չեն վերադառնում բանակցային սեղանին, որ լուծումներ գտնեն»:

Խաչատուր Քոքոբելյանը հետաքրքրվեց նաև Անվտանգության խորհրդի նիստին Նախագահ Սերժ Սարգսյանի՝ ԱԳՆ-ին ԼՂՀ-ին ռազմական փոխօգնության պայմանագրի հարցով հանձնարարականի գործընթացից:

Էդվարդ Նալբանդյանը նշեց, որ ՀՀ Նախագահի հանձնարարականն ընթացքի մեջ է։ Պայմանագիրը, որը ԼՂՀ-ի հետ միասին մշակվում է, պարզ գործընթաց չէ, և բավական աշխատանքի կարիք ունի և երբ որ աշխատանքը ավարտվի, պահը լինի այնպես, որ կարելի է պայմանագիր կնքել, դա կիրականացվի: