Վարչապետը պատրաստ է բացատրություն տալ քաղաքական ուժերին

Պետք է զգույշ ու պատասխանատու լինեն, քանի որ եթե պատգամավորներն ազատ են հայտարարություններ անելիս, ապա կառավարության անդամները նույն ազատությունը չունեն:

Այս մասին այսօր Ազգային ժողովում կառավարության հետ հարցուպատասխանի ժամանակ հայտարարեց ՀՀ վարչապետ Հովիկ Աբրահամյանը` արձագանքելով ԱԺ պատգամավոր Թևան Պողոսյանին:

Վերջինիս դիտարկմամբ՝ ապրիլյան սրացումներից հետո առավել ակնհայտ դարձան այն թույլ օղակները և նկատվեցին թերացումներ ոչ միայն ռազմական այլ նաև մնացյալ ոլորտներում:

«Այս համատեքստում տրամաբանական էր ՊՆ և ԶՈւ պաշտոնյաներին պաշտոններից ազատելը», -ասաց պատգամավորը:

Ի պատասխան պատգամավորի՝ վարչապետը նկատեց, որ ցանկացած քայլ, հայտարարություն կոնկրետ պատասխանատվություն է ակնկալում:

«Ապագայում մենք հանդես ենք գալու համապարփակ հայտարարությունով և այն բոլոր փոփոխությունները որոնք մենք պետք է իրականացնեինք 2016 թվականին, դրանք վերանայվելու են և մենք կներկայացնենք թե ինչ քայլեր ենք նախատեսում այս պատերազմից հետո և ինչ նոր փոփոխություն ենք կատարում մեր ռազմավարության մեջ ու կներկայացնենք հանրությանը և ԱԺ-ին», -հավելեց Աբրահամյանը:

Վարչապետը հորդորեց բոլորին, որ այս իրավիճակը չօգտագործեն՝ զբաղվելով պոպուլիզմով:

«Պոպուլիզմը խեղդել է որոշ քաղաքական գործիչների և անհատների: Ում ջրաղացին են քար գցում, դեռ անհայտ է: Դրական սպասումներ չունեն մեր պետության համար: Երբ անհրաժեշտ է, պետք է լինել միասնական, ոչ թե քարկոծենք, ցեխ շպրտենք: Կոչ եմ անում մեր քաղաքական ուժերին Ազգային ժողովի, անկախ նրանից իշխանական են, թե ընդդիմադիր, հավաքվենք ու քննարկենք: Առանց մամուլի, որովհետև հենց խոսափողը տեսնում եք, բոլորովին ուրիշ մարդիկ եք դառնում: Մենք պետք է փորձենք մեր խնդիրները միասին լուծել: Ովքեր կցանկանան քննարկել այս իրավիճակը կիսվելու, ազնվանալու անկեղծ քննարկելու, կողմ ենք: Կոչ եմ անում քաղաքական ուժերին հավաքվել, քննարկել, ձեզ կարող եմ բացատրություններ տալ»: