Իշխանության արբանյակը չի ուզում թոշակի գնալ. Ազատ Արշակյան` Վարդան Օսկանյանի մասին

Վարդան Օսկանյանն այսօր հայտարարեց նոր՝ «Համախմբում» կուսակցության հիմնադրման մասին: Ավելի ուշ Newspress.am-ի հետ զրույցում կուսակցության նախաձեռնող խմբի անդամ Երվանդ Բոզոյանը նշեց, որ «Համախմբումը» լինելու է ոչ թե իշխանամետ կամ ընդդիմադիր, այլ՝ այլընտրանքային:

Ի՞նչ է նշանակում քաղաքական դաշտում լինել այլընտրանքային, ի՞նչ խնդիրներ է լուծելու այն եւ լուծելո՞ւ է արդյոք, ի՞նչ իմաստ ուներ այլընտրանքային «Համախմբման» հիմնադրումը՝ հատկապես այն դեպքում, եթե հաշվի առնենք նախկինում իրենց այլընտրանքային հռչակած Բարգավաճ Հայաստան եւ Հայ ժողովրդական կուսակցությունների ճակատագրերը:

Այս հարցերի շուրջ զրուցել ենք Գերագույն խորհրդի նախկին պատգամավոր Ազատ Արշակյանի հետ:

-Այլընտրանքայինը հոմանիշն է անսկզբունքայինի, որովհետեւ եթե ասում են՝ կա քաղաքական սկզբունք, որին մենք հետեւում ենք, ուրեմն բոլոր նրանք, ովքեր մեզնից դուրս են, այլընտրանք են: Հիմա շուռ տված է: Ես կարծում եմ, որ Օսկանյանը պետք է հայտարարի՝ մենք սկզբունքային ենք, մնացածներն այլընտրանք են, բայց մարդը սկզբից հայտարարում է, որ ինքն անսզբունքային է: Ես ուզում եմ հասկանալ՝ ինչին են այլընտրանք, ինչին են զուգահեռ, ինչի լուսանցքում են իրենք, ինչի արահետն են:

Այլընտրանքայինը նաեւ հարմարվողականություն է նշանակում՝ գործող սկզբունքային իշխանությանը հարմարվել, կատարել նրա պատվերը: Արբանյակ կուսակցություն է դա, արբանյակ նշանակում է պտտվել իսկականի շուրջը: Ո՞րն իսկականը, դա պետք է Օսկանյանը ասի, որի՞ շուրջն է ինքը ուզում պտտվել:
Քաղաքական դաշտում նոր կուսակցության ձեւավորումը իշխանությունում լինելու սովորությունը հագեցնելու նպատակ ունի, մինչեւ ուժասպառ լինի, մինչեւ տեղափոխեն Եռաբլուր կամ Պանթեոն: Նպատակը դա է՝ հասնել Եռաբլուր կամ Պանթեոն: Եթե քաղաքական մայր խնդիր դրված չէ, Հանրապետական կուսակցության ծրագրերին այլընտրանքը ո՞րն է՝ դե՞մ են ԵՏՄ-ին, դե՞մ են Մաքսային միությանը, անվտանգության համակարգին, ազատ շուկայական հարաբերություններին. այլընտրանք ասածի մեջ շատ բան կա: Այ, եթե թվեին, թե ինչին են դեմ, ես կհասկանայի: Եթե չեն թվում, ես դա համարում եմ հարմարվողականություն, եւ ընդհանրապես զբաղմունք՝ թոշակի չի ուզում գնալ:

Ասում են՝ «Համախմբումը» գալիս է համախմբելու քաղաքական ուժերին, որոնք առանձին-առանձին չեն կարողանում լուծել հասարակությանը հուզող խնդիրները», իսկ ո՞վ է ասել, որ գործող քաղաքական ուժերն իրենց խնդիրները չեն լուծել. պաշտոն չունենալու այլընտրանքը պաշտոն ունենալն է, նրանք այդ խնդիրը լուծել են: Հիմա համախմբվել ինչի՞ համար՝ պաշտոն ունենալու՞: Իշխող ուժը նրանց այդքան տեղ չի տալիս, համախմբվեցին, տեղը չի հերիքելու:

Հասարակական խնդիրների ցանկը կա, նրանք դրանք չեն բարձրացնում, նրանք ասում են՝ մենք ուզում ենք լինել իշխանությունում, կողքից մեզ օգնեք, դառնանք: Դրա համար էլ չեն կարողանում համախմբվել, բոլորն ասում են՝ դուք մեզ օգնեք: Օսկանյանն ասում է՝ «ես Սերժ Սարգսյանի հրաժարականը չեմ պահանջում», այո՛, նա ուզում է լինել գլխավոր մոլորակի արբանյակ, նա սկզբունքային իշխանություն լինելու հայտ չի ներկայացնում:

Թե Ռոբերտ Քոչարյանն ինչ է ուզում անել, նա ինքը կհայտնի, մենք չենք կարող գուշակություններ անել, որովհետեւ Օսկանյանը հայտարարեց, որ Քոչարյանը չի մասնակցում այս ծրագրին: