Օսկանյանը փորձելու է առանձնացնել բիզնեսն իշխանություններից

«Ես կարծում եմ, որ իմ` իշխանության մեջ լինելը իմ վարկանիշը կբարձրացնի այն իմաստով, որ իշխանական համակարգում աշխատելու փորձ ունեմ»:
Այս մասին լրագրողների հետ զրույցում ասաց ԱԺ պատգամավոր Վարդան Օսկանյանը՝ անդրադառնալով «Համախմբում» կուսակցության առաջիկա գործունեությանը:

Նա նկատեց, որ տաս տարի աշխատել է արտաքին քաղաքական ոլորտում և տաս տարի էլ կուսակցական է եղել ու զբաղվել ներքաղաքական հարցերով:

Անդրադառնալով Ֆինանսական ռեսուրսներին՝ Օսկանյանը նկատեց. «Այդ ցանցը մենք լայն ենք նետելու, նույնիսկ հազար դրամ, տասը հազար դրամ, հնարավորինս լայն շրջանակներ ենք համախմբելու: Ես դիմելու եմ բիզնես շրջանակներին, հանդիպելու ուսանողներին, մենք պետք է մեր հասարակությանը ներգարվենք քաղաքական գործընթացներում»,- ասաց նա:

Դիտարկմանը, թե բիզնես շրջանակները իշխանության կողքին են՝ Օսկանյանն արձագանքեց. «Դա իսկապես մարտահրավեր է և ես փորձելու եմ այդ տաբուն ջարդել: Չի կարող մի երկրում բոլոր բիզնես շրջանակները լինել իշխանության կողքին»:

Միևնույն ժամանակ Օսկանյանը նշեց, որ չի պահանջելու Սերժ Սարգսյանի հրաժարականը:

Հ.Գ. Նկատենք, որ ժամանակին, երբ հայտնի բիզնեսմեն Գագիկ Ծառուկյանը հիմնադրեց Բարգավաճ Հայաստան կուսակցությունը և սկսեց ընդդիմադիր դաշտում գործունեություն ծավալել՝ նրա առաջ հարց դրվեց: Ծառուկյանը պետք է ընտրություն կատարեր ընդդիմադիր քաղաքականության և բիզնեսի միջև: Նա ընտրեց բիզնեսը և բիզնեսով կանգնեց իշխանության կողքին:

Եթե Գագիկ Ծառուկյանի նման ազդեցիկ բիզնեսմենին չհաջողվեց «տաբու ջարդել», ապա հարց է ծագում, թե ինչպես և ինչ նորարարությամբ Օսկանյանին կհաջողվի զատել բիզնեսը իշխանությունից: