«Համախմբումը» համախմբելու է քաղաքական վերնախավին եւ ակտիվ մարդկանց. Երվանդ Բոզոյան

«Համախմբում» կուսակցությունը լինելու է ոչ թե ընդդիմադիր կամ իշխանամետ, այլ այլընտրանքային: Այս մասին Newspress.am-ի հետ զրույցում ասաց «Համախմբում» կուսակցության նախաձեռնող խմբի անդամ, քաղաքագետ Երվանդ Բոզոյանը:

«Առաջիկա ընտրություններում մենք պետք է քաղաքական դաշտում ձեւավորենք լուրջ այլընտրանքային բեւեռ՝ մեր շուրջը համախմբելով քաղաքական վերնախավին եւ հասարակության այն ակտիվ մարդկանց, ովքեր երբեւէ որեւէ կուսակցության չեն հարել: Հասարակությունը պետք է տեսնի, որ բացի իշխանությունից, կա նաեւ իշխանությանն այլընտրանքային ուժ, որը նոր ծրագրեր է առաջարկում Հայաստանի զարգացման բոլոր ոլորտներում»,- ասաց Երվանդ Բոզոյանը:

Նրա խոսքով՝ չնայած Հայաստանում կա ավելի քան 70 կուսակցություն, փաստացի գործում է միայն մեկը՝ իշխանականը:

«Այն իր ցանցային համակարգով ներկայացված է ողջ Հայաստանով մեկ: Հայաստանի մնացած բոլոր կուսակցությունները քաղաքական խմբավորումներ են, որոնք առանձին-առանձին գործելով չեն կարող լուծել հասարակությանը հուզող խնդիրները: Ուստի մեր կուսակցության գլխավոր նպատակը պետք է լինի քաղաքական թիմերին համախմբելը»,- նկատեց Երվանդ Բոզոյանը:

Քաղաքագետի խոսքով՝ «Համախմբում» կուսակցությունը հրաժարվելու է տարածված պոպուլիստական գործելակերպից՝ հանդես գալով «ավելի առարկայական, իրատեսական ծրագրերով»:

«Քաղաքական ուժերը հանդես են գալիս հիմնականում տեսլականներով, թեզիսներով, որոնք ճիշտ է, դրական են ընկալվում, բայց պետք է հասկանալ, որ կա նաեւ իրականության խնդիր: Մենք փորձելու ենք հրաժարվել պոպուլիզմից եւ հանդես գալ կոնկրետ ծրագրերով ու անելիքներով»,- ասաց Երվանդ Բոզոյանը:

Թե խոսքը հատկապես ինչ ծրագրերի մասին է, Երվանդ Բոզոյանը դժվարացավ նշել. «Ամեն ինչ կներկայացնենք կուսակցության հիմնադիր համագումարի ժամանակ, որը ծրագրված է հունիսին»,- նշեց քաղաքագետը: