4+4+4 ձևաչափը ստատուս գրողների համար իմիտացիա ստեղծելու համար է

Ի սկզբանե Բարգավաճ Հայաստանը որևէ իլուզիա չուներ, թե 4+4+4 ֆորմատի քննարկման արդյունքում կոնսենսուս կլինի:

Այս մասին ԱԺ քառօրյա նիստի ժամանակ ասաց ԲՀԿ նախագահ, խմբակցության պատգամավոր Նաիրա Զոհրաբյանը:

Նրա խոսքով՝ վաղուց արդեն քաղաքական դաշտում փոխզիջումը, միմյանց տեսակետ լսելը, միմյանց տեսակետ հարգելը դարձել է քաղաքական կարմիր գրքում գրելու ձևակերպում:

«Որոշ քաղաքական ուժեր այդ քննարկումներին մասնակցում էին իմիտացիա ստեղծելու համար: Նրանց նպատակը ոչ թե կոնսենսուսն էր, այլ աղմուկն էր, որպեսզի սոցիալական ցանցերում սուրճի հետ, որպես պարտադիր աքսեսուար, ստատուսներ գրող որոշ աղանդավորական խմբավորումներ իրենց հանկարծ չմեղադրեն, որ կոնսեսուսի չգնալու մեջ»,- ասաց Զոհրաբյանը, հավելելով, որ ԲՀԿ-ն, այդուհանդերձ, հայտարարել էր, որ բոլոր ֆորմատներով քննարկումներին մասնակցելու է և դա չի եղել իմիտացիոն:

Նաիրա Զոհրաբյանը նկատեց, որ իրենց խմբակցությունը մոտ քսան առաջարկ է ներկայացրել, որոնց գերակշիռ մեծամասնությունը չի ընդունվել:
Էլեյկտրոնային մատնահետքով երաշխավորված ընտրություն, որը կապահովի մատնահետքով նույնականացում և տեղամասում նկարահանում կազմակերպելու համար դիմել համապատասխան կազմակերպություններին:

«Եթե արդար ընտրություններ անցկացնելու համար կան շահագրգիռ քաղաքական ուժեր, որոնք միայն իմիտացիա ստեղցծելու և զուտ աղմուկ բարձրացնելու համար չեն փորձում առաջարկություններ անել, ապա պետք է օր առաջ, ժամ առաջ, րոպե առաջ դիմեն միջազգային դոնոր կազմակերպություններին՝ հասկանալու, թե կա նման հնարավորություն, առնվազն մինչև հաջորդ խորհրդարանական ընտրություններ ունենալ էլեկտորնային երաշխավորված համակարգ»,-ասաց պատգամավորը՝ ընդգծելով, որ ինչքան ձգձգեն, այնքան այդ հնարավորւոթյունները ի չիք են դառնալու:

Նա նկատեց նաև, որ Հայաստանը կարմիր գիծը վաղուց անցել է և սթափվելու ժամանակն է: Եթե չստեղծվի ընտրական կայուն համակարգ, ապա Հայաստանը կդասվի այն երկրների շարքին, որոնց վրա կարելի է խաչ քաշել և գրել. «ավարտված է պատմությունը»: