Ադրբեջանը ռազմական նպատակներ չուներ, նրա նպատակները քաղաքական էին

«Ադրբեջանն անհրաժեշտություն ունի կրակելու, որովհետեւ եթե չկրակի, աշխարհում բոլորը կմոռանան Ղարաբաղի մասին: Ղարաբաղա-ադրբեջանական շփման գծում տեղի ունեցածը էսկալացիա էր, որը տեղավորվում է Ադրբեջանի քաղաքականության տրամաբանության մեջ»: Այս մասին այսօր՝ ապրիլի 27-ին, ասուլիսի ժամանակ նշեց «Կովկասի» ինստիտուտի տնօրեն, քաղաքագետ Ալեքսանդր Իսկանդարյանը:

«Տարիներ առաջ խոսքը գնում էր միայն դիպուկահարների կրակոցների մասին, հետո դա ընդլայնվեց աշխարհագրական առումով՝ հասնելով մինչեւ հայ-ադրբեջանական սահման, հետո գործի դրվեցին ծանր հրետանին, օդուժը, եւ ստեղծվեց այն իրավիճակը, որն ունեցանք ապրիլի սկզբին: Այսինքն՝ էսկալացիայի նման մակարդակ դեռ չէր եղել, բայց տրամաբանությունը լրիվ տեղավորվում է Ադրբեջանի քաղաքականության մեջ»,- ասաց Ալեքսանդր Իսկանդարյանը:

Ինչ վերաբերում է ՊՆախարար Սեյրան Օհանյանի եւ ՀՀ Աժ փոխնախագահ Հերմինե Նաղդալյանի իրարամերժ հայտարարություններին՝ կապված տարածքներ հանձնելու հետ, Ալեքսանդր Իսկանդարյանը նկատեց, որ դրանք տարբեր մարդկանց՝ զինվորականի եւ դիվանագետի կողմից արված հայտարարություններ են:

«Սեյրան Օհանյանը խոսել է որպես զինվորական՝ նկատի ունենալով մարտական նշանակության դիրքերը, որոնք ապահովում են անվտանգությունը: Տիկին Նաղդալյանը նկատի ունի, որ Հայաստանը պատրաստ է շարունակել բանակցությունները՝ Մադրիդյան սկզբունքների շրջանակներում, այսինքն՝ վերադառնալ բանակացությունների այն իրավիճակին, որը կար մինչեւ ապրիլի 1-ը»,- նշեց Ալեքսանդր Իսկանդարյանը:

Ալեքսանդր Իսկանդարյանի խոսքով՝ ապրիլի սկզբին տեղի ունեցած ռազմական գործողությունները բացահայտեցին հայ-ղարաբաղյան եւ ադրբեջանական բանակի ոչ միայն քանակական, այլեւ որակական տարբերությունները: Չնայած ծավալված լայնածավալ ռազմական գործողություններին, նրա խոսքով, ապրիլի սկզբին կատարվածը պատերազմ անվանել չի կարելի:

«Բացի քանակական տարբերությունից, որակական հսկայական տարբերություն կային այնտեղ: Դիվերսիոն խմբերը հարձակվել են 18 տարեկանների վրա, իսկ դիվերսիոն խմբերի պատրաստումը նույնքան ծախսատար է, որքան օդաչուների պատրաստումը: Երկրորդ, այն բախումները որ տեղի ունեցան, մարտական գործողություններ էին, բայց դա պատերազմ անվանել չի կարելի. պատերազմը բոլորովին այլ բնույթ ունի: Բացի այդ, Ադրբեջանի ղեկավարությունը ռազմական նպատակներ չուներ, նրա նպատակները քաղաքական էին»,- ասաց Ալեքսանդր Իսկանդարյանը:

Նա նկատեց, որ ձեռքբերված հրադադարի խախտումները եւ ամեն օր գրանցվող զոհերը ադրբեջանական կողմի վարած քաղաքականության հետեւանք են:

Նրա խոսքով՝ Ադրբեջանն անում է ամեն ինչ, որպեսզի ղարաբաղյան խնդիրը չմոռացվի միջազգային հանրության կողմից՝ հատկապես հիմա՝ Սիրիայի, Իրաքի, Դոնեցկի, Քուրդիստանի եւ մյուս տարածքների ֆոնին: