Ռոբերտ Քոչարյանը և Սերժ Սարգսյանը միմյանց ձեռնոց չեն նետել. Գառնիկ Իսագուլյան

«Ես միշտ էլ կողմնակից եմ եղել ՀՀ երեք նախագահների հանդիպմանը: Եվ կարող եմ ասել, շատ լավ կլիներ, եթե մեր նախագահները ցանկացած հարցի պարագայում համախմբվեին մեկ գաղափարի շուրջ »,- այսօր լրագրողների հետ հանդիպման ժամանակ ասաց ՀՀ-ում ԼՂՀ մշտական ներկայացուցչության խորհրդական խորհրդատու Գառնիկ Իսագուլյանը:

Newspress.am-ի այն հարցին, թե Ռոբերտ Քոչարյանի չհանդիպելով Սերժ Սարգսյանին, ինչն արեց ԼՏՊ-ն, արդյոք նշանակում է, որ Ռոբերտ Քոչարյանը ձեռնոց նետեց ՀՀ գործող նախագահին,քանի որ ՀՀկ-ականները շատ էին ուզում և ակնկալում այդ հանդիպումը, Իսագուլյանը պատասխանեց. «Ես չեմ կարծում,թե որևէ մեկը մյուսին ձեռնոց է նետել: Կարող եմ ուղակի ենթադրել, որ եթե ՀՀ երկրորդ նախագահը չի հանդիպել Սերժ Սարգսյանին, ուրեմն դրա անհրաժեշտությունը չի գտել»:

Խոսելով քառօրյա պատերազմի մասին` Իսագուլյանը նշեց, որ 22 տարի շարունակ թշնամին գործում է նույն ռեժիմով: Ուստի այս քառօրյա պատերազմը մեզ համար անսպասելի չէր: Բոլոր այն պնդումները, թե իբր ԼՂՀ-ի իշխանությունները կամ պաշտպանության բանակը ինչ-որ առումով տեղյակ չեն եղել, որ ադրբեջանական կողմում կան կուտակումներ և ցանկացած պահի հնարավոր են լուրջ պրովակացիաներ, չեն համապատասխանում իրականությանը:

«Սկսելով ռազմական գործողությունները՝ ադրբեջանցիները պատկերացնել անգամ չէին կարող, որ խրամատում գտնվող հայ զինվորը կարող է դուրս գալ բաց ճակատ և կանգնել թշնամու դեմ: Մենք մեր հաղթանակի համար նախ և առաջ պարտական ենք մեր առաջին գծում կանգնած շարքային զինվորներին: Եվ ես կարող եմ ասել, որ մեր զինվորները չեն մահացել, նրանք անմահացել են»,- հավելեց Իսգուլյանը: