Հայոց ցեղասպանության 101-րդ տարելիցին նվիրված արարողություններ են տեղի ունեցել ԱՄԷ-ում և Մեքսիկայում

Հայոց ցեղասպանության 101-րդ տարելիցի շրջանակներում Արաբական Միացյալ Էմիրություններում տեղի են ունեցել ոգեկոչման արարողություններ:

ԱԳՆ մամուլի ծառայության հաղորդմամբ՝ Ապրիլի 22-ին Աբու Դաբիի Ս.Նահատակաց եկեղեցում Արաբական Միացյալ Էմիրությունների և Կատարի Կաթողիկոսական փոխանորդ Հոգեշնորհ Տեր Մեսրոպ Վրդ. Սարգիսյանի նախագահությամբ մատուցվել է ապրիլյան սուրբերին նվիրված ժամերգություն:

Ապրիլյան սուրբերին նվիրված ժամերգություն է մատուցվել նաև ապրիլի 23-ին Շարժայի Ս.Գրիգոր Լուսավորիչ եկեղեցում՝ նախագահությամբ ԱՄԷ և Կատարի Կաթողիկոսական փոխանորդ Հոգեշնորհ Տեր Մեսրոպ Վրդ. Սարգիսյանի:

Ոգեկոչման արարողություններին ներկա են եղել դիվանագետներ, ազգային մարմինների ներկայացուցիչներ, հայ համայնքի անդամներ:

Նախարարության լրատվական ծառայությունից հայտնում են, որ Հայոց ցեղասպանության 101-րդ տարելիցին նվիրված միջոցառումներ են տեղի ունեցել նաև Մեքսիկայում:
Ապրիլի 24-ին, Մեխիկոյում ՀՀ դեսպանության նախաձեռնությամբ, Մեքսիկայի մայրաքաղաք Մեխիկոյի Սանտա Մարիա դե Գուադալուպե եկեղեցում մատուցվել է սուրբ պատարագ` նվիրված Մեծ եղեռնի սրբադասված անմեղ զոհերի հիշատակին:

Պատարագից հետո քաղաքի կենտրոնական այգիներից մեկում՝ Պարկե դե Մեխիկոյում, տեղի է ունեցել արարողություն, որին իրենց մասնակցությունն էին բերել մեքսիկահայ համայնքը և մեքսիկացի մտավորականները: Արարողության ընթացքում տասնամյակներ առաջ Մեխիկոյի կենտրոնական այգիներից մեկում տեղադրված հուշարձան-ժամացույցը, որը 1915թ. իրադարձությունները վերապրած փախստականների նվիրատվությունն է Մեխիկոյին, վերածվել է ցեղասպանության զոհերի հուշարձանի: