Վարչապետը համառորեն պաշտպանում է իր ունեցվածքը

Մարդկանցից ունեցածը խլելը վատագույն և վտանգավոր ճանապարհն է: Այս մասին ԱԺ-ում լրագրողների հետ զրույցի ժամանակ ասաց հանրապետական պատգամավոր Սամվել Նիկոյանը՝ անդրադառնալով դիտարկմանն, ըստ որի, գործարարներն ու պաշտոնյաները պետք է իրենց դղյակները վաճառեն ու գումարը տրամադրեն սպառազինությանը: Նա դրա անհրաժեշտությունը չի տեսնում:

Խոսքը մասնավորապես վարչապետ Հովիկ Աբրահամյանի մասին է, ով նախօրեին հայտարարել էր, որ որևէ սխալ չի արել, որի համար ամաչի. հավելելով, որ եթե հարկ լինի կվաճառի իր առանձնատունը և գումարները կուղղի բանակի սպառազինմանը: Միևնույն ժամանակ հայտարարել էր, թե «…բայց մեր պետությունը սպառազինության հետ կապված ֆինանսական խնդիր չունի»:

Հիշեցենք, որ վարչապետը յուրաքանչյուր նախաձեռնությունների ժամանակ փոխանցում է իր մեկ ամսվա աշխատավարձը: Նա միացել էր գյումրեցի 13 անօթևան ընտանիքներին բնակարան գնելու նախաձեռնությանը և իր մեկ ամսվա աշխատավարձը փոխանցելով դրամահավաքին:

Վարչապետը նաև իր մեկ ամսվա աշխատավարձն է փոխանցել Արցախին՝ ապրիլյան դեպքերի հետ կապված:

Վարչապետը որևէ դրամահավաքի, անմասն չի մնում, սակայն սահմանափակվում է միայն իր մեկ ամսվա աշխատավարձով:

Եթե Հովիկ Աբրահամյանը վարչապետ չդառնար, այդպես էլ նրա հարազատ ծննդավայրում՝ Մխչյանի գյուղի մանկապարտեզի ճանապարհը կմնար քարքարոտ ու դժվարանցանելի:

ՀՀ վարչապետ Հովիկ Աբրահամյանի ծննդավայրի` Արարատի մարզի Մխչյան գյուղի մանկապարտեզ տանող ճանապարհն ասֆալտապատելու համար պետբյուջեից «Բերմա» ընկերությանը տրամադրվել է 22 միլիոն 887 հազար դրամ:

Հովիկ Աբրահամյանի հարստությունը հասնում է տասնյակ միլիոնների, բնակարաններ, հողատարածքներ, գործարաններ, տարբեր բիզնես-ոլորտներում մասնաբաժիններ և երկար-երկար հարստության ցանկ:

Սակայն նման հարստությունների ֆոնին, անգամ ծննդավայրի մանկապարտեզի ճանապարհը նա վերանորոգեց կառավարության փողերով, մանկապարտեզ, որտեղ գուցե այցելում են նաև նրա բարեկամ-ազգականների երեխաները և ահա նման վարվելակերպ որդեգրած անձը, ով իր գյուղի համար մեկ լումա էլ չի տրամադրում, կարո՞ղ է իր անծայր հարստությունից որևէ լումա փոխանցել ընդհանուր ազգային գործին, իհարկե՝ ոչ, միայն իր մեկ ամսվա աշխատավարձը:

Իսկ Սամվել Նիկոյանը պարզապես պաշտպանում է Հովիկ Աբրահամյանին և նրա նման չպատճառաբանված հարստացողներին, ովքեր ատամներով պաշտպանում են իրենց ունեցվածքը, իհարկե յուրաքանչյուր ազգապահպան նախագծի դեպքում՝ փոխանցում մեկ ամսվա աշխատավարձը: