Եվգենիա Մեդվեդևան (Բաբասյան) կանանց գեղասահքի համաշխահային ռեկորդ է սահմանել

Գեղասահքի կանանց աշխարհի և Եվրոպայի չեմպիոնուհի 16-ամյա Եվգենիա Մեդվեդևան (հայրական ազգանունը Բաբասյան) ԱՄՆ-ի Սպոկան քաղաքում փայլուն արդյունքի է հասել` կանանց գեղասահքում հավաքելով ռեկորդային միավորներ:

«Արմենպրես»-ը տեղեկացնում է, որ հայազգի գեղասահորդուհին, ով միջազգային հարթակում ներկայացնում է Ռուսաստանը, կանանց մենասահքի թե՛ պարտադիր, թե՛ ազատ ծրագրում իրեն հավասարը չունեցավ ու կրկին լավագույնը ճանաչվեց:

Մեդվեդևան ազատ ծրագրով ելույթի ժամանակ համաշխահային նոր ռեկորդ է սահմանել: Նրան հաջողվել է արձանագրել 151,55 միավոր արդյունք ու գերազանցել դեռ տակավին վերջերս ԱՄՆ-ի Բոսթոն քաղաքում մեծահասակների գեղասահքի աշխարհի առաջնությունում իր իսկ կողմից սահմանած ռեկորդային ցուցանիշը՝ 150,10 միավոր:

Չնայած Մեդվեդևայի բացահայտ առավելությանը մրցակցուհիների հանդեպ, այնուամենայնիվ անգամ այդ արդյունքները բավարար չեղան Ռուսաստանի գեղասահքի հավաքականի համար, որը վերջնական հաշվարկում հետ մնաց միայն Հյուսիսային Ամերիկայի հավաքականից: Մրցաշարում 3-րդ տեղը նվաճել են Ասիայի հավաքականի ներկայացուցիչները:

Եվգենիա Մեդվեդևան միջազգային մրցահարթակում հանդես է գալիս մորական ազգանվամբ: Հայրը` Արման Բաբասյանը, ռուսաստանաբնակ հայ է: Մեդվեդևայի մայրը, ով բաժանվել է գեղասահորդուհու հորից, նախկինում զբաղվել է գեղասահքով: