Ռյութեն խոստացել է պաշտպանել Լեհաստանի տարածքի յուրաքանչյուր թիզը՝ ռուսական հրթիռների և անօդաչուի անկումից հետո
ՆԱՏՕ գլխավոր քարտուղար Մարկ Ռյութեն Վարշավա կատարած այցի ընթացքում խոստացել է պաշտպանել Լեհաստանի տարածքի յուրաքանչյուր թիզը՝ այդ երկրի տարածքում ռուսական երեք օդային օբյեկտների անկումից հետո, հաղորդել է dpa-ն։
Միջադեպը տեղի է ունեցել ուրբաթ՝ Ուկրաինայի ուղղությամբ ռուսական հարվածների ֆոնին։
«Ես կարող եմ երաշխավորել, որ ՆԱՏՕ-ն կպաշտպանի Լեհաստանի տարածքի յուրաքանչյուր թիզը», — ընդգծել է դաշինքի գլխավոր քարտուղարը։
Նա տեղի ունեցածն ակնհայտորեն վտանգավոր միջադեպ է անվանել և հայտնել, որ Եվրոպայում ՆԱՏՕ միացյալ զինված ուժերի գերագույն գլխավոր հրամանատարն անընդհատ գնահատում է դաշինքի զսպման և պաշտպանության վիճակը։ Ռյութեի խոսքով՝ ՆԱՏՕ-ն կձեռնարկի բոլոր անհրաժեշտ միջոցները՝ սպառնալիքները բացահայտելու և անհրաժեշտության դեպքում պաշտպանական ծրագրերը ճշգրտելու համար։
Լեհաստանի կառավարության տվյալներով՝ ռուսական երեք օդային օբյեկտներ մտել են երկրի օդային տարածք, ապա ընկել դրա տարածքում։ Լեհաստանի պաշտպանության նախարար Վլադիսլավ Կոսինյակ-Կամիշը հայտարարել է, որ դրանցից երկուսը, ենթադրաբար, թևավոր հրթիռներ են եղել, երրորդը՝ անօդաչու թռչող սարք։ Տուժածներ չկան։
Ռյութեն հանդիպել է նաև Լեհաստանի վարչապետ Դոնալդ Տուսկի հետ, որը Մոսկվային մեղադրել է արևմտյան երկրների զորավարժությունների ֆոնին միտումնավոր սադրանքի դիմելու մեջ։
Լեհաստանում անցկացվում են այսպես կոչված «Ցանկացողների կոալիցիայի» առաջին զորավարժությունները՝ 11 երկրի 2,8 հազար զինծառայողի մասնակցությամբ։ Մինչև նոյեմբերի 22-ը տևող զորավարժությունները կազմակերպվել են Մեծ Բրիտանիայի և Ֆրանսիայի ղեկավարությամբ։ Դրանց նպատակն է մշակել Ուկրաինայում պատերազմի ավարտից հետո կայուն խաղաղություն ապահովելու միջոցառումներ։
Պատերազմի ուսումնասիրման ամերիկյան ինստիտուտի (ISW) վերլուծաբանները նույնպես միջադեպը կապել են զորավարժությունների հետ։ Նրանց գնահատմամբ՝ Կրեմլը կարող էր միտումնավոր կազմակերպել օդային տարածքի խախտումներ զորավարժությունների ընթացքում՝ ՆԱՏՕ արձագանքը ստուգելու և «Ցանկացողների կոալիցիայի» կողմից Ուկրաինային հետագա աջակցությունը զսպելու համար։