Մենք շատ հիանալի ժողովուրդ ենք ու խաղաղությունն էլ թանկ է ամեն բանից

Հայ երաժիշտ, երգահան Արա Գևորգյանն ապրիլի առաջին օրերին, երբ թշանամին նախահարձակ ռազմական գործողություններ էր սկսել Լեռնային Ղարաբաղի Հանրապետությունում, որպես կամավոր է գրվել: Այս պահին սպասում է Արցախ գնալու իր հերթին: Քառօրյա պատերազմից մշակութային գործիչը մի քանի հետևություններ է արել:

«Այդ ռազմական գործողություններից պարզ դարձավ, որ մեր հակառակորդն իսկապես սրիկա է: Նաև պարզ դարձավ, որ մենք շատ հիանալի ժողովուրդ ենք և իրավունք ունենք արժանապատիվ ապրելու:  Մենք պետք է մշտապես, ոչ միայն վտանգի պահին,  լինենք մեր զինվորի կողքին՝ և նյութապես, և բարոյապես, բոլոր առումներով, նաև զենքը ձեռքներիս»,-Ծիծեռնակաբերդի բարձունքում Panorama.am-ի հետ զրույցում ասաց երաժիշտը:

Գևորգյանն այս պահին մի ցանկություն ունի, որպեսզի թեկուզ վտանգի պահին ձեռք բերված միասնությունը պահպանվի, վայր դրվեն կուսակցական դրոշներն ու բոլորը մտածեն հայ ժողովրդի, երկրի ու հայկական բանակի մասին. «Եթե կա հնարավորություն էլ ավելի զինել, եթե կա հնարավորություն, էլ ավելի համախմբել, այդ դեպքում մեզ հաղթել չի լինի»:

Արա Գևորգյանին ուրախացրել են պատերազմական գործողությունների օրերին քաղաքական կուսակցությունների միասնական հայտարարություններն ու գործողությունները:

«Այս փորձությունը մենք անցել էինք 90-ականների սկզբին: Ինքս էլ բախտ եմ ունեցել մասնակցել պատերազմին՝ Բերդաձորի ջոկատում: Շատ չեմ բարձրաձայնել դրա մասին, համենայն դեպս… եթե մեզ չեն կարողացել ոչնչացնել, չեն էլ կարողանա»,-ասաց նա:

Գևորգյանը չի ցանկանում անդրադառնալ տարատեսակ քննադատություններին, որոնք վերաբերում են բանակի սպառազինությանն ու այլ հարցերին:

«Ես զերծ կմնամ դրանք մեկնաբանելուց, որովհետև կողմնակից եմ գովալ մեր բանակը»,-ասաց նա:

Ինչ վերաբերում է «տարածքներ հանձնելու» վերաբերյալ խոսակցություններին, ապա Արա Գևորգյանը խոստովանում է՝ իր մտածելակերպը մի քիչ այլ է:

«Ես միշտ եղել եմ խաղաղության կողմնակից եմ: Խաղաղությունը թանկ է ամեն բանից, ամեն ինչից: Բայց երբ մեզ պարտադրված է պատերազմ, մենք ստիպված ենք խաղաղություն պարտադրել: Այդ պարտադրելու ժամանակ ինչ կշահենք, ինչ կկորցնենք, արդեն այդտեղ չեն հաշվում: Տա աստված, որ մենք շահողի դերում լինենք, որովհետև պատմության ընթացքում մեզ միշտ փորքացրել են: Պետք է առիթը կարողանալ օգտագործել, ինչու չէ նաև ընդլայնվել: Բայց ես էլի եմ կրկնում, ես ավելի շատ խաղաղության մարդ եմ, եթե հնարավոր է խաղաղ բանակցությունների միջոցով պահպանել այն ամենը, ինչ մենք այսօր ունենք, ես դրա կողմանկից եմ»,-ասաց նա:

Նյութն ամբողջությամբ` սկզբնաղբյուր կայքոմ