ԵԱՏՄ մաքսային օրենսգրքում փոփոխություններ կկատարվեն. ինչ կփոխվի բիզնեսի համար
Եվրասիական տնտեսական հանձնաժողովի մաքսային համագործակցության հարցերով նախարար Սերգեյ Շկլյաևը պատմել է 2026 թվականին ԵԱՏՄ մաքսային օրենսգրքի փոփոխությունների երկու փաթեթի նախապատրաստման մասին, որոնք պետք է պարզեցնեն լոգիստիկան, աջակցեն բարեխիղճ բիզնեսին և պայմաններ ստեղծեն Միությունում մաքսային գործընթացների հետագա թվային վերափոխման համար։
Փոփոխությունների առաջին փաթեթը. գործառնությունների արագացում և պայքար «գորշ» սխեմաների դեմ
Փոփոխությունները կվերաբերեն օրենսգրքի բոլոր բաժիններին, իսկ դրանց գլխավոր նպատակը ենթակառուցվածքային խոչընդոտների վերացումն է։ Կատարվող փոփոխությունները կպարզեցնեն ապրանքների առանձին կատեգորիաների, դրանց թվում՝ բեռնարկղերի տեղափոխումը, ինչպես նաև կկանոնակարգեն կոնտրեյլերային և կաբոտաժային փոխադրումները։ Բացի դրանից, նախատեսված է «կեղծ տարանցման» սխեմաներին հակազդելու մեխանիզմ. այդ սխեմաները երկար ժամանակ սողանցք էին շուկայի անբարեխիղճ մասնակիցների համար։ Փաստաթուղթը ներպետական ընթացակարգերի անցկացման եզրափակիչ փուլում է, իսկ Միության երկրների ղեկավարների կողմից դրա ստորագրումը նախատեսվում է 2026 թվականի դեկտեմբերին։
Փոփոխությունների երկրորդ փաթեթը. տեխնոլոգիական վերակառուցում և աջակցություն բարեխիղճ բիզնեսին
Փոփոխությունները հիմք են դնում մաքսային ծառայության աշխատանքի տեխնոլոգիական վերակառուցման համար։ Առանցքային նորամուծությունը լիազորված արտահանողների ինստիտուտի ստեղծումն է, որը հնարավորություն կտա զգալիորեն նվազեցնել բարեխիղճ բիզնեսի վարչական բեռը։ Ամրագրվում է նախնական տեղեկատվությունն էլեկտրոնային ձևով ներկայացնելու առաջնահերթությունը և հնարավորություն է ընձեռվում ապրանքները մակնշել անմիջապես ժամանակավոր պահպանման պահեստներում և մաքսային պահեստներում, ինչը զգալիորեն կարագացնի լոգիստիկ շղթաները։ Այդ փաստաթուղթը մշակվել է Հանձնաժողովի հարթակում՝ Միության պետությունների հետ համատեղ, և այժմ անցնում է կարգավորող ազդեցության գնահատում։
Ինչպես ընդգծել է Սերգեյ Շկլյաևը, Միության մաքսային օրենսգրքում փոփոխությունների կատարումը մաքսային կարգավորման կատարելագործմանն ուղղված աշխատանքի կարևոր տարրերից մեկն է՝ բիզնեսի համար անխոչընդոտ միջավայր ստեղծելու նպատակով։ Դրան զուգահեռ՝ Հանձնաժողովը կշարունակի միասնականացնել մաքսային մարմինների և արտաքին տնտեսական գործունեության մասնակիցների միջև էլեկտրոնային փաստաթղթաշրջանառությունը և զարգացնել տեղեկատվական փոխգործակցությունը Միության ընդհանուր գործընթացների շրջանակում։