Եթե Ադրբեջանը մեր դեմ պատերազմելու առիթ է ման գալիս, գտնելու է՝ Սահմանադրությունը փոխեք, թե ոչ. Քրիստինե Վարդանյան
«Ինչո՞ւ եք պատերազմով սպառնում։ Եթե Ադրբեջանը մեր դեմ պատերազմելու առիթ է ման գալիս, գտնելու է՝ Սահմանադրությունը փոխեք, թե ոչ»։ Այս մասին ԱԺ-ում իր ելույթում հայտարարեց «Հայաստան» խմբակցության պատգամավոր Քրիստինե Վարդանյանը։
Դիմելով արդարադատության նախարար Սրբուհի Գալյանին՝ պատգամավորը հարցրեց.
«Սրբուհի Գալյան, Ադրբեջանը մեզ համար սպառնալիք է, թե՞ սպառնալիք չէ։ Եթե սպառնալիք է, բնական է, որ երբ ասում է՝ Սահմանադրությունդ փոխիր, դա քո լավի համար չի ասում։ Հիմա, եթե սպառնալիք չէ, պատասխանեք հաջորդ հարցին՝ ինչո՞ւ եք պատերազմով սպառնում։ Ադրբեջանը Հայաստանի հետ խաղաղությո՞ւն է ուզում, թե՞ պատերազմ։ Այս հարցն ունի երկու պատասխան․ կա՛մ պատերազմ է, կա՛մ խաղաղություն։
Եթե Ադրբեջանը մտադիր չէ Հայաստանի դեմ պատերազմել, ուրեմն սա բլեֆ է։ Ուրեմն դուք բլեֆ եք անում՝ նոր զիջումներ կորզելու համար, եթե Ադրբեջանը մտադիր չէ մեր դեմ պատերազմել։ Այդ հարցի պատասխանը դուք պիտի տաք։
Եթե Ադրբեջանը ուզում է պատերազմել ու առիթ է ման գալիս, այդ առիթը գտնելու է՝ Սահմանադրությունը փոխեք, թե չփոխեք։ Ձեր նստած ձևը մի օր իրեն դուր չի գալու, և դա առիթ է դառնալու։ Եթե Ադրբեջանը մեր դեմ պատերազմելու առիթ է ման գալիս, ինքը գտնելու է։ Հիմա պատասխանեք՝ առիթ է ման գալի՞ս, թե՞ խաղաղություն է ուզում»,- հայտարարեց Քրիստինե Վարդանյանը։