«Կարո՞ղ է՝ ի սկզբանե իշխանության ձեր գալն էր սխալ, կամ գնալու ժամանակն է». Դավիթ Ղազինյանը՝ ՔՊ-ականներին
«Խոսում եք ուղղորդումից՝ մարդիկ մտքեր են ասում, ի միջի այլոց՝ սխալ։ Կարո՞ղ է՝ ինադու են ձեզ սխալ ուղղորդում»,- 2027 թվականի պետական բյուջեի քննարկման ժամանակ ունեցած ելույթում ասաց «Ուժեղ Հայաստան» խմբակցության պատգամավոր Դավիթ Ղազինյանը՝ արձագանքելով ՔՊ-ական պատգամավոր Մարիա Կարապետյանին։
Վերջինս հայտարարել էր, թե բարերար Սամվել Կարապետյանն իր կապիտալը Ռուսաստանում կուտակել է հայ ժողովրդի հաշվին։
Ղազինյանը հայտարարեց, որ Սամվել Կարապետյանը պարտական է իր ժողովրդին, քանի որ հայ է, չի կտրվել իր ժողովրդից և բարեգործություն է արել։
Արձագանքելով ՔՊ-ականների այն որակավորմանը, թե Կարապետյանը զբաղվել է «քաղաքական բարեգործությամբ», ընդդիմադիր պատգամավորը հարցրեց.
«Լո՞ւրջ, այսինքն՝ 30 տարի այդ մարդը շատ մեծ բան է անում Հայաստանի համար, որ 30 տարի հետո Եկեղեցո՞ւն պաշտպաներ։ Դա մտքի աննախադեպ թռիչքի արգասիք է»։
Ղազինյանը սուտ որակեց Հ1-ի եթերում Ռոմանոս Պետրոսյանի հայտարարությունը, թե Սամվել Կարապետյանը ՀԷՑ-ը գնել է 30 մլրդ դոլարով։
Ըստ Ղազինյանի՝ դրանից բացի՝ Սամվել Կարապետյանն իր վրա է վերցրել նաև 12 մլրդ դրամի կրեդիտորական պարտքը և 110 մլն դոլարի պարտքը։ Իսկ 8 տարի անց ՀԷՑ-ի 85 մլրդ շահույթից իր բաժինը կազմել է 23 մլրդ դրամ։
Նշելով, որ ՔՊ-ական իշխանությունը ՀԷՑ-ին վերագրում է սխալներ այն դրվագներով, որոնք ժամանակին միջազգային աուդիտի արդյունքում ընդունել են Հանրային ծառայությունները կարգավորող հանձնաժողովը և կառավարությունը՝ «Ուժեղ Հայաստան» խմբակցության պատգամավորը հարցրեց.
«Կարո՞ղ է՝ ի սկզբանե իշխանության ձեր գալն էր սխալ, կամ գնալու ժամանակն է»։