Փաշինյանի վարքը ցայտնոտի և փակուղու դրսևորում է. Լիլիթ Գալստյան
«Բռնության դեմ պայքարող, բարեվարքության խոստում տված քաղաքական ուժի առաջնորդը երեկ սեփական հարկի տակ կին լրագրողին անվանեց «եղկելի»»,- ԱԺ նիստում հայտարարեց «Հայաստան» խմբակցության պատգամավոր Լիլիթ Գալստյանը։
Ընդդիմադիր պատգամավորը շեշտեց, որ Փաշինյանը նույն որակումն է տվել նաև ընդդիմությանը, որը, նրա խոսքով, «շահարկում» է և «մանրադրամ դարձնում «Եռաբլուրը»»։
«Ինքնին «Եռաբլուր» և «մանրադրամ» բառերն իրար կողքի դնելը բարոյական չէ, որովհետև հայի համար Եռաբլուրը, առհասարակ, արժանապատվության, ցավի, ամոթի, նաև պարտքի տարածք է։ Այն կարող էր չընդլայնվել և որպես խարան չմնալ մեր պատմության էջերում, եթե երկիրը հավասարակշռված ներքին և արտաքին քաղաքականություն ունենար, եթե երկրի ղեկը ստանձնած անձնավորությունը գիտակցեր ազգային շահի առաջնահերթությունը, եթե «իշխանությո՞ւն, թե՞ պետական շահ» դիլեմայում ընտրվեր հայկական պետության շահը։ Իսկ հիմա բոլոր կարմիր գծերը հատած Փաշինյանը փորձում է իրեն դիրքավորել որպես կրքոտ հռետոր»,- ասաց Գալստյանը՝ հակադարձելով, որ իրականում կրքոտ հռետորներ են եղել Նժդեհը, Չերչիլն ու Արամ Մանուկյանը։
Նշելով, որ պատմությունը Փաշինյանին բոլորովին այլ գնահատական է տալու, իսկ նրա վարքը ցայտնոտի և փակուղու դրսևորում է՝ Գալստյանը հիշեցրեց, որ նա տապալել է իր բոլոր խոստումները, հրապարակավ հրաժարվել նախկին հայտարարություններից և ներկայում առաջարկում է «Իրական Հայաստանը», որն իր վախերի, անկարողության և անձնական արժեհամակարգի պրոյեկցիան է։
Ընդդիմադիր պատգամավորը նկատեց, որ Փաշինյանն անհավասարակշիռ վարք է դրսևորել նաև արտաքին քաղաքականության մեջ՝ Հայաստանը դարձնելով աշխարհաքաղաքական շահերի բախման մանրադրամ։