Ոչ մի թիզ հող զիջելու մասին խոսք անգամ չի կարող լինել.Սեյրան Օհանյան

Շփման գծի հյուսիսային հատվածում երեկ լարված է եղել, կրակոցներն ավելացել են, սակայն իրավիճակը հստակ վերահսկվում է:

Այսօր`ապրիլի 24-ին, Ծիծեռնակաբերդի հուշահամալիրում լրագրողների հետ զրույցում ասաց Պաշտպանության նախարար Սեյրան Օհանյանը:

Նա նկատեց, որ ձեռք է բերվել ժամանակավոր հրադադարի պայմանավորվածություն, որը պետք է մեզ հետ տանի 1994 թվականին ստորագրված եռակողմ փաստաթղթին: Պաշտպանության նախարարը վստահեցրեց, որ հրադադարի պահպանման պայմանավորվածությունը պահելու համար ամեն ինչ պետք է անել:

«Հրադադարի պաշտպանումը վստահության մթնոլորտի, միջազգային հետաքննական մեխանիզմների ձևավորումն է, որ հետագայում հիմք կհանդիսանա բանակցային գործընթացում առաջընթաց ունենալու համար: Թե ինչ նպատակներ ունենք այսօր, մենք այդ ուղղությամբ աշխատում ենք, մեր բանակը պատրաստ է հետ մղել ցանկացած գործողություն»,- ասաց նա:

Սեյրան Օհանյանի խոսքով` ոչ մի թիզ հող զիջելու մասին խոսք անգամ չի կարող լինել:

«Հարկավոր է փոխհամաձայնությունների եզրեր գտնել, որը կտանի խաղաղ ճանապարհով Արցախյան հարցի լուծման: Երկխոսություն է պետք, եթե այդ երկխոսությունը չկա, ինչի՞ մասին է խոսքը»,- ասացնկատեց նախարարը` հավելելով, որ Արցախը՝ որպես հակամարտող կողմ, պետք է մասնակցի բանակցություններին, հակառակ դեպքում հարցի լուծման վերջնական փուլում մենք պետք է ԼՂՀ հանրապետության ղեկավարության հետ նորից զրոյից սկսենք: