«Բա դուք ինչի՞ եք սաղ մնացել ձեր թիմով». լրագրողի հարցը հունից հանեց Նիկոլ Փաշինյանին
«Դուք անձամբ և ձեր նման բազմաթիվ լրագրողներ ու քաղաքական գործիչներ արդեն երկար ժամանակ Եռաբլուրը դարձրել եք մանրադրամ՝ ձեր նեղ լրագրողական և քաղաքական շահերի համար։ Ես ուղիղ ասում եմ՝ դուք անձամբ»,- ճեպազրույցի ժամանակ հայտարարել է Նիկոլ Փաշինյանը՝ պատասխանելով Tribune-ի թղթակից Հռիփսիմե Ջեբեջյանի հարցին։
Լրագրողը, ցուցադրելով Եռաբլուրում հուղարկավորված զոհվածների մարմինների լուսանկարները, հարցրել է.
«Նայում եք հայ մարդու աչքերի մեջ և առանց աչք թարթելու ասում՝ հաշիվ եք ուզում, բա դու ինչո՞ւ չես զոհվել։ Սա Եռաբլուրի պատկերն է։ Այս գերեզմանաքարերը, այս պարկերով դիակները, այս ամեն ինչը հերիք չէ՞։ Դուք Դուբլին էիք գնացել, Ալիևին հարցրե՞լ եք՝ բա դու հորդ հետ ինչո՞ւ չես մեռել։ Հարցրե՞լ եք նրան։ Ինչո՞ւ եք անընդհատ հայերին հասնում։ Եվ, ընդհանրապես, կներեք արտահայտությանս համար, բա դուք ինչո՞ւ եք ողջ մնացել՝ ձեր Կոնջորյանը, Խանդանյանը, Արայիկ Հարությունյանը, Վահան Կոստանյանը, չծառայածներով և ընդհանրապես ձեր թիմով»։
Ի պատասխան՝ Փաշինյանը հայտարարել է, որ «Ուժեղ Հայաստան» և «Հայաստան» խմբակցությունները, ինչպես նաև այլ քաղաքական շրջանակներ ու անհատներ երկար ժամանակ Եռաբլուրը դարձրել են քաղաքական և հանրային մանրադրամ։
«Դուք այդ ճանապարհին եղկելի եք, պարզապես եղկելի, որովհետև ձեր նման մարդիկ ընդհանրապես ի՞նչ գիտեն Եռաբլուրից։ Ձեզ համար Եռաբլուրը ընդամենը մանրադրամ է՝ ձեր հանրային և քաղաքական գործունեության մեջ օգտագործելու համար։ Այսուհետ ինչքան Եռաբլուրի անուն տվող լինի, ասելու եմ՝ դադարեցրեք ձեր եղկելի գործելակերպը»,- ասել է Փաշինյանը՝ հավելելով. «Այո, սատկացնելու եմ բոլոր նրանց, ովքեր Եռաբլուրը մանրադրամ են դարձնում։ Եղկելի եք, եղկելի եք, անձամբ դուք»։
Փաշինյանի խոսքով՝ այսօր խաղաղության հաստատման գործընթաց է ընթանում, և պետք չէ այն հետ շրջել ու Հայաստանը կրկին դարձնել «չպետություն»։ Նա նաև հայտարարել է, որ 44-օրյա պատերազմը տեղի է ունեցել Հայաստանի անկախության համար։
«Ես, այո, ասելու եմ, ես ընդհանրապես չեմ պատրաստվում հանդուրժել... Մեկ, երկու, երեք, չորս, հինգ։ Հերիք է Եռաբլուրը շահարկեք։ Ասում եմ՝ դուք և Եռաբլուրը շահարկող բոլոր անձինք եղկելի եք, պարզապես եղկելի։ Եռաբլուրը ինձնից առաջ է ստեղծվել»,- ասել է Փաշինյանը։
Հռիփսիմե Ջեբեջյանը հայտարարել է, որ «եղկելի» արտահայտության համար դատի է տալու Փաշինյանին, ինչին վարչապետը հորդորել է դա անել։