«Եթե ֆինանսների նախարար եք ու թվերը չգիտեք, բա ի՞նչ գիտեք». Ղազարյանը՝ Հովհաննիսյանին
«Երբ «Ուժեղ Հայաստան» խմբակցության ղեկավարը ձեզ հարց ուղղեց բյուջեի և մակրոտնտեսական երկու առանցքային ցուցանիշների վերաբերյալ, դուք չկարողացաք պատասխանել։ Նույնը տեղի ունեցավ նաև Նոնա Ավետիսյանի՝ ներդրումների վերաբերյալ հարցի դեպքում։ Երկու դեպքում էլ պարզվեց, որ դուք չեք տիրապետում համապատասխան ցուցանիշներին»,- 2027 թվականի պետական բյուջեի նախագծի քննարկման ժամանակ ֆինանսների նախարար Վահե Հովհաննիսյանին դիմեց «Ուժեղ Հայաստան» խմբակցության պատգամավոր Էդգար Ղազարյանը՝ հավելելով.
«Եթե դուք ֆինանսների նախարար եք և թվերը չգիտեք, բա ի՞նչ գիտեք»։
Ղազարյանը հորդորեց նախարարին գոնե իր հարցին պատասխանել՝ հետաքրքրվելով, թե նախկինում Արցախի Հանրապետությանը տարեկան տրամադրվող միլիարդավոր դրամների ընդհանուր չափը որքան էր, և Արցախի հանձնումից հետո որքան են կազմել այդ միջոցների կորստի հետևանքները։
«Որպեսզի մեր ժողովուրդն իմանա, թե ինչ չափի թալան եք իրականացրել ձեր պաշտոնավարման ընթացքում, ինչպես եք կեղեքել ու թալանել մեր ժողովրդին, կարո՞ղ եք ասել այդ թալանի չափը»,- հարցրեց ընդդիմադիր պատգամավորը։
Վահե Հովհաննիսյանն արձագանքեց, որ Ղազարյանը զբաղված է «կոնտենտ ստեղծելով», սակայն ընդունեց, որ բազմաթիվ թվերի չի տիրապետում, քանի որ «ազգային վիճակագրությունը հատորներ է», և ինքը պարտավոր չէ հիշել բոլոր ցուցանիշները։
Ֆինանսների նախարարը նշեց, որ Արցախին տրամադրվող գումարներն ուղղվում էին հիմնականում սոցիալական աջակցության ծրագրերին, իսկ մյուս հարցերին հրաժարվեց պատասխանել՝ դրանք անիմաստ համարելով։
Նկատելով, որ նախարարը անիմաստ է համարում իրենց հասցրած վնասի չափի վերաբերյալ հարցը՝ Էդգար Ղազարյանը հակադարձեց.
«Դուք կարող եք միլիարդավոր դրամների ծախսեր իրականացնել, այդ գումարները կարող են անհետանալ, և երբ ԱԺ-ում՝ հաշվետվողականության շրջանակում, ձեզ հարց են տալիս դրանց մասին, դուք այդ հարցը համարո՞ւմ եք անիմաստ»։
Այնուհետև Ղազարյանն անդրադարձավ նախարարի աշխատավարձին՝ նշելով, որ Հովհաննիսյանը հայտարարագրել է 27 մլն դրամ աշխատավարձ, ինչը ամսական կազմում է շուրջ 2,3 մլն դրամ և, ըստ պատգամավորի, կրկնակի գերազանցում է օրենքով սահմանված աշխատավարձի չափը։
«Գոնե կարո՞ղ եք մեր ժողովրդին ասել՝ մեր պետությունը թալանելուց ու կեղեքելուց հետո ինչո՞ւ եք մի հատ էլ աշխատավարձի գծով լրացուցիչ թալանում մեր բյուջեն։ Պատրա՞ստ եք միլիոն առ միլիոն այդ գումարները վերադարձնել, որովհետև ձեր պարագայում կոպեկ առ կոպեկ չէ, այլ՝ միլիոն առ միլիոն»,- հարցրեց ընդդիմադիր պատգամավորը։
Վահե Հովհաննիսյանն ի պատասխան նշեց, որ իր աշխատանքի դիմաց ստանում է օրենքով սահմանված աշխատավարձ, որը հրապարակային հայտարարագրում է։
«Ձեզ արդարանալու ոչինչ չունեմ։ Ձեզ դուր չի գալիս իմ եկամուտը՝ կարող եք համապատասխան կարգով, չգիտեմ, ինչ-որ բան անել»,- պատասխանեց Հովհաննիսյանը։