Միրզոյանը ԵՄ-ում ներկայացրել է «ԹՐԻՓՓ»-ի իրականացման ուղղությամբ Հայաստանի քայլերը
Նոյեմբերի 16-ին Բրյուսելում ՀՀ արտաքին գործերի և միջազգային առևտրի նախարար Արարատ Միրզոյանը մասնակցել է Եվրոպական միության նախաձեռնությամբ կազմակերպված «Միջտարածաշրջանային անվտանգություն և փոխկապակցվածություն» խորագրով նախարարական հանդիպմանը։
Անդրադառնալով ՀՀ-ԵՄ փոխկապակցվածության գործընկերությանը՝ Արարատ Միրզոյանը կարևորել է սահմանային անցակետերի և տրանսպորտային ենթակառուցվածքների զարգացման, մաքսային ընթացակարգերի պարզեցման, առևտրի թվայնացման, ինչպես նաև էներգետիկ և թվային փոխկապակցվածության ընդլայնման ուղղությամբ համագործակցությունը։ Այս համատեքստում նախարարն ընդգծել է, որ քաղաքական հանձնառությունները պետք է վերածվեն կոնկրետ, չափելի արդյունքներ ապահովող ծրագրերի՝ միջազգային ֆինանսական հաստատությունների և մասնավոր հատվածի ներգրավմամբ։
Հանդիպմանը մասնակցել են ԵՄ արտաքին գործերի և անվտանգության քաղաքականության հարցերով բարձր ներկայացուցիչ Կայա Կալասը, ԵՄ ընդլայնման հարցերով հանձնակատար Մարթա Կոսը, միջազգային գործընկերության հարցերով հանձնակատար Յոզեֆ Սիկելան, ինչպես նաև ԵՄ անդամ պետությունների, Ուկրաինայի, Մոլդովայի, Թուրքիայի, Հարավային Կովկասի երկրներից նաև Ադրբեջանի Կենտրոնական Ասիայի երկրների՝ Ղազախստանի, Ղրղզստանի, Տաջիկստանի, Թուրքմենստանի և Ուզբեկստանի ԱԳ նախարարներն ու ներկայացուցիչները: