Նախ հերթեր են ստեղծում, հետո առաջարկում մինչև 88 650 դրամ վճարել՝ դրանցից ազատվելու համար․ նոր գներ՝ անձնագրի համար
Իշխանությունը հերթական վճարովի ծառայությունն է առաջարկում քաղաքացիներին։ Նոյեմբերի 14-ից հասանելի են կենսաչափական անձնագրերի և նույնականացման քարտերի ամենասեղմ ժամկետում տրամադրման ծառայությունները։ Այսուհետ փաստաթուղթը հնարավոր կլինի ստանալ Երևանում՝ 24 ժամում, մարզերում՝ 48 ժամում։
Սակայն արագությունը էժան չի լինելու։ Նույնականացման քարտի համար գործող 5950 դրամ վճարին ավելանում է ևս 8000 դրամ, և ընդհանուր արժեքը դառնում է 13 950 դրամ։ Կենսաչափական անձնագրի դեպքում 28 650 դրամին ավելանում է 60 000 դրամ, այսինքն՝ քաղաքացին ստիպված կլինի վճարել ընդհանուր 88 650 դրամ։
Ստացվում է՝ նախ քաղաքացիները բախվում են փաստաթղթերի ստացման բարդ ընթացակարգերի, երկար հերթերի և առցանց գրանցման խնդիրների, ապա նրանց առաջարկվում է այդ քաշքշուկից խուսափելու վճարովի տարբերակ՝ բավականին բարձր հավելավճարով։
Հարց է առաջանում՝ ինչո՞ւ քաղաքացին պետք է լրացուցիչ տասնյակ հազարավոր դրամներ վճարի պետական ծառայությունից ողջամիտ ժամկետում օգտվելու համար։ Պետական համակարգի պարտականությունը ծառայությունը պատշաճ կազմակերպելն է, ոչ թե քաղաքացիներին արագության համար հավելյալ վճարելու առաջ կանգնեցնելը։
Երբ պետական ծառայությունից օգտվելու բնականոն ժամկետը դառնում է արտոնություն, իսկ ժամանակը՝ վճարովի ծառայություն, քաղաքացին կրկնակի է վճարում՝ և՛ գումարով, և՛ նյարդերով։
Արմինե Մկրտումյան