Երևան մուտքը կսահմանափակվի․ պարզվում է՝ Ավինյանի թիրախում ոչ թե մարզաբնակներն են, այլ մեքենաները
Պարտադրանքը վերաբերելու է ավտոմեքենայի տեսակին, ոչ թե մարդու բնակության հասցեին: Երևանի քաղաքապետարանի ավագանու նիստում հայտարարեց Տիգրան Ավինյանը՝ մարզային տրանսպորտի մուտքը Երևան սահմանափակելու մասին:
Այդ ամբողջ հոսքը վերահսկելու համար պարտադրանքը վերաբերելու է ավտոմեքենայի տեսակին՝ կախված դրա արտանետումների ծավալից և մեր առողջությանը հասցվող վնասի չափից։ Պարտադրանքը վերաբերելու է ավտոմեքենային և դրա տեսակին։ Մարդու բնակության հասցեն բացարձակապես կապ չի ունենալու դրա հետ»,- ասել է նա:
Անդրադառնալով իրավախախտումներին Ավինյանը նշել է՝ մեր խնդիրն է ֆիքսել այն խախտումները, որոնք ստեղծում են երթևեկության ընդհանուր հոսքի խնդիր։
«Այսինքն՝ մեր խնդիրը պետք է լինի կենտրոնանալ միայն դրանց վրա։ Կան խախտումներ, որոնք Երևանի քաղաքապետարանի տեսանկյունից էական չեն, կարևոր չեն։ Այսինքն՝ մեր ենթակառուցվածքը պետք է ծառայի երթևեկության հոսքն ապահովելու համար կարևոր իրավախախտումների արձանագրմանը։ Ինչպիսին է, օրինակ, խաչմերուկը փակելը։ Շատ կարևոր տեսակի իրավախախտում է, որ մեր բոլոր ենթակառուցվածքներն ու տեսախցիկներն օգտագործելով՝ բոլոր խաչմերուկներում հստակ արձանագրումներ անենք։
Երկրորդը՝ խաչմերուկների մոտ կայանած ավտոմեքենաներն են։ Այո՛, գիտեմ, որ այստեղ տուգանքների հարցն ավելացել է, բայց պետք է հասկանանք՝ որ դեպքում ենք բալ հանում, այս դեպքում բալ հանվո՞ւմ է, թե՞ ոչ: Երևանի քաղաքապետարանն արդեն իսկ համապատասխան տեսանյութերն ուղարկում է ՆԳՆ, ինչի միջոցով մեր գործընկերները կարողանում են տուգանել իրավախախտներին։ Կարծում եմ՝ այս քանակը մենք կարող ենք աստիճանաբար ավելացնել»,- նշել է Ավինյանը։