Ռուսաստանի և Աֆղանստանի միջև ապրանքաշրջանառությունը տարվա 8 ամսում ավելի քան կրկնապատկվել է

Ռուսաստանի փոխվարչապետ Ալեքսեյ Օվերչուկը Քաբուլում հանդիպել է Աֆղանստանի տնտեսական հարցերով փոխվարչապետ Աբդուլ Գանի Բարադարի հետ։ Կողմերը քննարկել են առևտրատնտեսական համագործակցության զարգացման և արդյունաբերության, առողջապահության, դեղագործության, գյուղատնտեսության, երկրաբանության, էներգետիկայի, տրանսպորտի ու լոգիստիկայի ոլորտներում փոխգործակցության հեռանկարները։ Առանձին անդրադարձ է կատարվել մաքսային համագործակցությանն ու միջտարածաշրջանային կապերի զարգացմանը։

2026 թվականի առաջին 8 ամիսների արդյունքներով՝ Ռուսաստանի և Աֆղանստանի միջև ապրանքաշրջանառությունը նախորդ տարվա նույն ժամանակահատվածի համեմատ աճել է ավելի քան երկու անգամ՝ գերազանցելով 349 մլն դոլարը։ Ռուսաստանի արտահանումն Աֆղանստան աճել է 2,1 անգամ, իսկ աֆղանական ապրանքների ներմուծումը Ռուսաստան՝ 2,2 անգամ։

Ալեքսեյ Օվերչուկն ընդգծել է, որ Ռուսաստանը շահագրգռված է Աֆղանստանի կայուն զարգացմամբ։ Այդ նպատակին հասնելու հիմնական գործիքներից մեկը, նրա խոսքով, առևտրային կապերի ընդլայնումն է, այդ թվում՝ աֆղանական արտադրանքի արտահանմանն աջակցությունը ռուսական շուկա։

Աբդուլ Գանի Բարադարը ռուսական ընկերություններին հրավիրել է մասնակցելու արդյունաբերության, էներգետիկայի, հանքային ռեսուրսների, նավթի և գազի հանքավայրերի հետախուզման ու շահագործման նախագծերին։

Օվերչուկին ընդունել է նաև Աֆղանստանի վարչապետ Մոհամմադ Հասան Ախունդը։ Հանդիպմանը քննարկվել են երկկողմ հարաբերությունների զարգացման և առևտրատնտեսական համագործակցության ընդլայնման հեռանկարները։ Ռուսաստանի փոխվարչապետն առաջարկել է կապեր հաստատել Աֆղանստանի և Եվրասիական տնտեսական հանձնաժողովի միջև։

Պաշտոնական բանակցություններին զուգահեռ Քաբուլում տեղի են ունեցել նաև գործարար հանդիպումներ, որոնց մասնակցել են ռուսական բիզնեսի ավելի քան 70 և աֆղանական ընկերությունների շուրջ 100 ներկայացուցիչներ։

Բանակցությունների արդյունքներով՝ Ալեքսեյ Օվերչուկի և Աբդուլ Գանի Բարադարի ներկայությամբ ստորագրվել է պաշտոնական և առևտրային փաստաթղթերի փաթեթ՝ ուղղված երկու երկրների միջև առևտրատնտեսական կապերի զարգացմանն ու ինստիտուցիոնալացմանը։

Փաստաթղթերը վերաբերում են ռուսական ցորենի, ալյուրի, պարենային ապրանքների, դեղագործական արտադրանքի, բժշկական սարքավորումների, ուժային և էներգետիկ սարքավորումների մատակարարմանը, ինչպես նաև ոչ ալկոհոլային խմիչքների արտադրության ոլորտում համագործակցությանը։ Նախատեսվում է նաև Աֆղանստանից Ռուսաստան նռան, թարմ մրգերի և չրերի մատակարարումների զարգացում։