Culinary World Cup 2026. Լուսինե Հովակիմյանը Հայաստանը կներկայացնի խոհարարական արվեստի աշխարհի հեղինակավոր առաջնությունում

Հայ խոհարարական արվեստը հերթական անգամ ներկայանալու է միջազգային հարթակում։

Լուսինե Հովակիմյանը կներկայացնի Հայաստանը Culinary World Cup 2026 – Vatel Luxembourg միջազգային առաջնությունում, որը տեղի կունենա նոյեմբերի 21-25-ը:

Culinary World Cup 2026 – Vatel Luxembourg-ը խոհարարական արվեստի աշխարհի ամենախոշոր և հեղինակավոր միջազգային առաջնություններից մեկն է, որը տեղի է ունենում Լյուքսեմբուրգում՝ EXPOGAST միջազգային գաստրոնոմիական ցուցահանդեսի շրջանակում՝ 4 տաի մեկ անգամ:

Culinary World Cup-ը պարզապես խոհարարական մրցույթ չէ․ սա միջազգային հարթակ է, որտեղ տարբեր երկրների լավագույն խոհարարները ներկայացնում են իրենց ազգային խոհանոցը, մասնագիտական հմտությունները, ստեղծագործական մոտեցումներն ու խոհարարական նորարարությունները։

Մրցույթի ընթացքում մասնակիցները ներկայացնում են իրենց խոհարարական վարպետությունը: Մասնակից խոհարարները պատրաստում են բազմատեսակ ուտեստներ, այդ թվում՝ երեք ճաշատեսակից բաղկացած մրցութային մենյուներ, որոնք գնահատվում են միջազգային ժյուրիի կողմից։

Այս տարի մրցույթին մասնակցում է 61 երկիր:

Հայաստանը, միջազգային մասնագիտական հարթակում, կներկայացնի Լուսինե Հովակիմյանը՝  իր խոհարարական մշակույթով և ազգային գաստրոնոմիական արժեքներով։

Լուսինե Հովակիմյանի մասնակցությունը կարևոր հնարավորություն է՝ միջազգային հարթակում ներկայացնելու Հայաստանը, հայկական խոհանոցի հարուստ ավանդույթներն ու ազգային գաստրոնոմիական ժառանգությունը։

Հայկական խոհանոցն իր յուրահատուկ համերով, դարավոր ավանդույթներով և տարածաշրջանային բազմազանությամբ մեր մշակութային ինքնության կարևոր մասն է։ Նման միջազգային մրցույթները հնարավորություն են տալիս այն ներկայացնելու համաշխարհային հանրությանը՝ միաժամանակ նպաստելով հայկական խոհարարական արվեստի ճանաչելիության բարձրացմանը։

Լուսինե Հովակիմյանին մաղթում ենք հաջողություն, ոգեշնչում և արժանապատիվ ելույթ՝ ի փառս Հայաստանի և հայկական խոհարարական արվեստի։

Հայաստանը ներկայացնելը մեծ պատասխանատվություն է և միաժամանակ՝ պատիվ։

Հավելենք միայն, որ Լուսինե Հովակիմյանը Հայաստանի Հանրապետության «Քաղցր Ծաղիկներ» խոհարարական և հրուշակագործական ֆեդերացիայի փոխնախագահն է, Ռուսաստանի խոհարարական արվեստի եռակի չեմպիոն, «Best of Gastronomy» միջազգային կազմակերպության դեսպան՝ Ֆրանսիայի կողմից շնորհված 7-րդ աստիճանի որակավորմամբ, ինչպես նաև Մոսկվայի խոհարարների ասոցիացիայի անդամ։

Նա իր երկարամյա աշխատանքով նշանակալի ուղի է անցել խոհարարական և հրուշակագործական արվեստում։ Մասնագիտացած լինելով ֆրանսիական հրուշակագործության մեջ՝ ստեղծում է հեղինակային բաղադրատոմսեր, ինքնատիպ համային համադրություններ և գեղարվեստական բարձրարժեք աշխատանքներ։

Լուսինե Հովակիմյանի գործունեության կարևոր ուղղություններից է նաև երիտասարդ սերնդի մասնագիտական կրթությունը։ Նա իր գիտելիքներն ու փորձը փոխանցում է երեխաներին՝ օգնելով նրանց բացահայտել իրենց տաղանդը և ձեռք բերել ապագա մասնագիտություն։