Քաղաքացին կազատվի իր սեփականության հասցեի անհամապատասխանությունները վերացնելու պարտականությունից. նախագիծ

«Օրենքի կարգավորումները հնարավորություն կտան հասցեավորման հետ կապված խնդիրները լուծել ոչ միայն քաղաքացու դիմումի հիման վրա, այլև անշարժ գույքի պետական ռեգիստրի և հասցեավորումն իրականացնող լիազոր մարմինների նախաձեռնողական համագործակցության միջոցով»,- կառավարության նիստում ասաց Կադաստրի կոմիտեի ղեկավար Սուրեն Թովմասյանը՝ զեկուցելով ««Գույքի նկատմամբ իրավունքների պետական գրանցման մասին» օրենքում լրացումներ և փոփոխություններ կատարելու մասին» օրենքի նախագիծը։

Նա նշեց, որ փոփոխությունների արդյունքում արդեն իսկ գրանցված անշարժ գույքերի հասցեների անհամապատասխանությունները հնարավոր կլինի վերացնել առանց քաղաքացիների համար լրացուցիչ ֆինանսական բեռ առաջացնելու։

Ըստ Թովմասյանի՝ օրենքի փոփոխությամբ կապահովվի հասցեների վերաբերյալ միասնական, ամբողջական, հավաստի և գործող ստանդարտներին համապատասխան պաշտոնական էլեկտրոնային տեղեկատվական բազայի ձևավորումը։

«Մեր գերխնդիրն է հասնել նրան, որ ունենանք կենտրոնական շտեմարան և հետո օրենսդրորեն կարգավորենք այն բոլոր ծառայություն մատուցողների հետ փոխադարձ հարաբերությունները, որոնք պետք է օգտվեն արդեն կենտրոնական շտեմարանից, և այս տվյալները պետք է փոփոխվեն «լայվ» ռեժիմով կոնկրետ այն պահին, երբ, օրինակ, հենց փողոցի անվանափոխման խնդիր է առաջանում համայնքի մոտ, և տեղի է ունենում փողոցի անվանափոխում շտեմարաններում»,-ասաց Թովմասյանը։

Ըստ Կադաստրի կոմիտեի ղեկավարի՝ նախատեսվում է ներդնել համակարգ, որտեղ «լայվ» ռեժիմով կերևան կոնկրետ փոփոխությունները, և երբ հասցեների փոփոխությունները կմուտքագրվեն հասցեների շտեմարան, անմիջապես այդ փոփոխությունները կարտապատկերվեն ՀՀ ազգային գեոպորտալում, և դա դառնալու է համընդհանուր գործիք, որից օգտվելու են, և այն ստանալու է իրավական ուժ արդեն օրենսդրական հետագա կարգավորումների ժամանակ։