ԵՄ-ն ևս պահանջում է Հայաստանից Սահմանադրության փոփոխություն. Clingendael վերլուծական կենտրոն

Հայաստանը դարձել է Եվրամիության գլխավոր գործընկերը Հարավային Կովկասում, մինչդեռ Բրյուսելի հարաբերությունները Վրաստանի հետ վատթարացել են նույնիսկ Թբիլիսիի և Մոսկվայի հարաբերություններից ավելի ցածր մակարդակի ֆոնին:

Այս մասին նշվում է նիդերլանդական Clingendael վերլուծական կենտրոնի հետազոտության մեջ, որը հիմնված է տարածաշրջանի 41 փորձագետների հարցման վրա։

ԵՄ-ի հետ Հայաստանի հարաբերությունները գնահատվել են 10 հնարավորից 8,47 միավորով։ Սա հետազոտության մեջ դիտարկված 51 զույգ երկրների շարքում երրորդ արդյունքն է։ Վրաստանի և Եվրամիության հարաբերությունները գնահատվել են ընդամենը 2,57 միավորով:

«Հարաբերությունների վերակառուցում և մրցակցություն․ Հարավային Կովկասի աշխարհաքաղաքական քարտեզը 2026 թվականին» զեկույցում նշվում է, որ դեռևս 2023 թվականին Վրաստանը տարածաշրջանում ԵՄ-ի ամենամոտ գործընկերն էր։ Այն ժամանակ Թբիլիսիի հարաբերությունները Բրյուսելի հետ դրական էին գնահատվում, իսկ Մոսկվայի հետ հարաբերությունները՝ բացասական։

«Այժմ ԵՄ-ն հիմնականում իր ուշադրությունը կենտրոնացնում է Հայաստանի, այլ ոչ թե Վրաստանի վրա, որը նախկինում նրա նախընտրելի գործընկերն էր», – ասվում է զեկույցում։

Փորձագետները հատկապես բարձր են գնահատել Հայաստանի և Ֆրանսիայի հարաբերությունները՝ 9,27 միավոր։ Ավելի բարձր գնահատական է ստացել միայն Ադրբեջանի և Թուրքիայի հարաբերությունը՝ 9,31 միավոր։ Երևանի և Մոսկվայի հարաբերությունները գնահատվել են 3,80 միավորով։ Եթե 2023 թվականին դրանք համարվում էին երկիմաստ, ապա այժմ բնութագրվում են որպես չափավոր թշնամական։ Միևնույն ժամանակ, Հայաստանը շարունակում է տնտեսական և ռազմավարական առումներով կախված մնալ Մոսկվայից։

Հետազոտության հեղինակներն առանձնացրել են երեք հարց, որոնք կորոշեն ԵՄ-ի հետագա քաղաքականությունը տարածաշրջանում․ ինչ որոշում կընդունի Բրյուսելը Վրաստանի վերաբերյալ հունվարին, արդյոք Հայաստանը ԵՄ-ին անդամակցելու հայտ կներկայացնի, և արդյոք Երևանը կկարողանա փոփոխել Սահմանադրությունը՝ Ադրբեջանի հետ խաղաղության համաձայնագրի կնքման համար։