Հետիոտնին վրաերթի ենթարկած շտապօգնությունը ինսուլտով հիվանդի է տեղափոխել. ևս 2 շտապօգնություն են կանչել. մանրամասներ

Երևանի Շիրակի փողոցում հետիոտնին վրաերթի ենթարկած Շտապօգնության մեքենան այդ պահին գլխուղեղի արյան շրջանառության սուր խանգարում (գլխուղեղի ինսուլտ) ախտորոշմամբ և անգիտակից վիճակում մի բուժառուի է հոսպիտալացնելիս եղել: Այս մասին Sputnik Արմենիային հայտնել է «Շտապօգնություն» ՓԲԸ տնօրենի պաշտոնակատար Հարություն Հարությունյանը:

Նշենք, որ ավելի վաղ shamshyan.com կայքը հայտնել էր, որ դեպքը տեղի է ունեցել նոյեմբերի 8-ին, երեկոյան: Վրաերթի ենթարկված քաղաքացին փողոցը չթույլատրելի հատվածով է անցնելիս եղել։

«Նոյեմբերի 8-ին, երեկոյան ժամը 23:15-ի սահմաններում Շիրակի փողոցի միջնամասում վրաերթի է ենթարկել մոտ 30-35 տարեկան տղամարդու: Նա փողոցը հատելիս է եղել չթույլատրվող հատվածով, նաև պետք է դիտարկել գիշերային վատ տեսանելի պայմանները, անձրևային եղանակը: Շտապօգնության բրիգադն էլ լուսային ազդանշանը միացրած է եղել, երթևեկության կանոնների խախտում չի կատարել, սահմանված արագության գերազանցում չի եղել, մոտավորապես 40 արագությամբ երթևեկելիս է եղել»,- նշեց Հարությունյանը։

Նա պատմեց, որ վրաերթի ենթարկելուց հետո դեպքի վայր անմիջապես մոտեցել է ևս 2 շտապօգնության բրիգադ, որից մեկը վրաերթի ենթարկված բուժառուին է հոսպիտալացրել տարածքային բազմապրոֆիլ բժշկական կենտրոն։ Մյուս բրիգադը արդեն վթարված բրիգադում գտնվող ինսուլտով բուժառուին է հոսպիտալացրել

Երկու բուժառուների վիճակն էլ կայուն է: ՇՕ տնօրենը շեշտեց, որ և՛ երեկոյան, և՛ առավոտյան այցելել է վրաերթի ենթարկված քաղաքացուն, զրուցել նրա հետ: Անձը գիտակից է, կոնտակտի մեջ է մտնում, վիճակը գնահատվում է կայուն։

Փաստի առթիվ նախաձեռնվել է քրեական վարույթ, պարզվում են դեպքի բոլոր հանգամանքները։