Մինսկում քննարկվել են Եվրասիայում անվտանգության նոր ճարտարապետության ձևավորման հեռանկարները

Մինսկում Եվրասիական անվտանգության հարցերով միջազգային չորրորդ համաժողովի շրջանակում տեղի է ունեցել «ՀԱՊԿ-ը Մեծ Եվրասիայում․ ներկա վիճակն ու հեռանկարները» խորագրով աշխատանքային նիստը։

Միջոցառմանը մասնակցել են Բելառուսի Անվտանգության խորհրդի պետական քարտուղարի առաջին տեղակալ Ալեքսանդր Նևերովսկին, Ռուսաստանի Անվտանգության խորհրդի քարտուղարի տեղակալ Ալեքսանդր Վենեդիկտովը, ՀԱՊԿ գործող գլխավոր քարտուղար Տաալաթբեկ Մասադիկովը, 2023-2025 թվականներին ՀԱՊԿ գլխավոր քարտուղարի պաշտոնը զբաղեցրած Իմանգալի Տասմագամբետովը, 2003-2016 թվականներին ՀԱՊԿ գլխավոր քարտուղար Նիկոլայ Բորդյուժան, ինչպես նաև կազմակերպության անդամ պետությունների մշտական խորհրդի անդամներ և մի շարք երկրների գիտական ու փորձագիտական շրջանակների ներկայացուցիչներ։

Քննարկման առանցքում են եղել Մեծ Եվրասիայում անվտանգության նոր ճարտարապետության ձևավորման, տարածաշրջանի գիտական և փորձագիտական համայնքների արդյունավետ համագործակցության, ինչպես նաև ավանդական և նոր մարտահրավերներին ու սպառնալիքներին դիմակայելու հարցերը։

Միջոցառման ընթացքում ներկայացվել է Ռուսաստանի գիտությունների ակադեմիայի Չինաստանի և ժամանակակից Ասիայի ինստիտուտի, Սոցիալ-պահպանողական քաղաքականության կենտրոնի և ՀԱՊԿ քարտուղարության համատեղ պատրաստած «ՀԱՊԿ-ը՝ որպես անվտանգության և զարգացման տարածք․ միջհարթակային համագործակցության հեռանկարները» խորագրով վերլուծական զեկույցը։