Կառավարությունը հաստատեց 6 և ավել անչափահաս երեխաներ ունեցող ընտանիքների բնակարանային ապահովման պետական աջակցության ծրագիրը

«Այս միտքը ծագել է Ձեզ դիմած մի քաղաքացու հետ նամակագրության հետքերով, երբ քաղաքացին խնդրում էր իր բազմազավակ ընտանիքին որևէ պետական աջակցության ծրագրով օգնել, և մենք Ձեզ հետ քննարկումների արդյունքում եկանք եզրակացության, որ դրա լուծումը առանձին ծրագիր ունենալն է»,-Փաշինյանին դիմելով կառավարության նիստին ասաց աշխատանքի և բարեկեցության նախարար Արսեն Թորոսյանը՝ զեկուցելով 6 և ավել երեխաներ ունեցող ընտանիքների բնակարանային ապահովման պետական աջակցության ծրագիրը և ծրագրի իրականացման կարգը։

Նրա խոսքով՝ ՀՀ-ում 6-ից ավելի անչափահաս երեխա ունեցող 600-ից ավելի ընտանիք կան, որոնցից շատերը գրանցված են  անապահովության համակարգում։ 

«Ծրագրով այն ընտանիքներին, որոնք 2027 թվականի հուլիսի 1-ի դրությամբ կունենան 6 և ավելի անչափահաս երեխա, յուրաքանչյուր երեխայի հաշվարկով 4-ական միլիոն դրամի հավաստագիր ենք տալիս, որը կարող է իրացվել բանկային հիփոթեքային ծրագրերի վարկավորման միջոցով՝ տուն կառուցելու կամ ձեռք բերելու համար։ Ավելին՝ եթե ընտանիքները որոշեն, որ այդ տունը կառուցվելու է գյուղական բնակավայրում, մենք ևս 4 մլն դրամ ենք տրամադրում»,-ասաց Թորոսյանը։

Փաշինյանն էլ հավելեց. «Ճիշտն ասած, պարո՛ն Թորոսյան, հենց նիստի գալուց առաջ, այսինքն՝ աստիճաններով բարձրանալիս էր, որ ես մտածեցի, որ նախկինում մենք խոսել ենք այն մասին, որ այս ծրագրերը, նման ծրագրերը որոշակի կապվածություն պետք է ունենան նաև «300 դպրոց, 500 մանկապարտեզ» ծրագրի հետ, որովհետև, եթե ունենք դեռևս այնպիսի իրավիճակներ, որ մենք կառուցել ենք դպրոցներ՝ նկատի ունենալով ոչ թե աշակերտների այսօրվա կամ նույնիսկ շատ տեսանելի պոտենցիալը, այլ պոտենցիալը մեծացնելը, պետք է ծրագիրը փորձենք կապել նաև այդ խնդրի հետ»։