Կառավարությունը հաստատել է Ֆիզիկական արհեստական բանականության 7-ամյա ծրագիրը

«Ներկայացվող նախագիծը բխում է միանգամից մի քանի ուղղություններով մեր ռազմավարական անելիքներից»,-կառավարության նիստում ասաց ԿԳՄՍ նախարար Ժաննա Անդրեասյանը՝ զեկուցելով Ֆիզիկական արհեստական բանականության 7-անյա  ծրագիրը։

Նրա խոսքով գիտության ռազմավարության այն ուղղությունն է, որը ենթադրում է, որայնտեղ ներդրումները պետք է իրականացվեն ինչպես պետության, այնպես էլ մասնավորի կողմից։

«Երկրորդը, ինչին ուղղված է այս ծրագիրը, բուհերում առավել ակտիվ գիտական հետազոտությունների իրականացումն է, բաև սրանից բխող՝ բուհերի վարկանիշավորման համակարգում ակնկալվող առաջխաղացումն է, որը կարող ենք գրանցել այս ընդհանուր համագործակցության և հետազոտության ու կրթության որակի բարձրացման արդյունքում»,- ասաց Անդրեասյանը։

Նա զեկուցեց, որ նախագծով առաջարկվում է հաստատել Ֆիզիկական արհեստական բանականության 7-ամյա ծրագիր, որն իրականացվելու է պետություն-մասնավոր համագործակցությամբ և համաֆինանսավորման սկզբունքով։

ԿԳՄՍ նախարարի խոսքով, դրա նպատակն է ԵՊՀ-ում, Հայաստանի ազգային պոլիտեխնիկական համալսարանում և Հայաստանի ամերիկյան համալսարանում ձևավորել ռոբոտաշինության և ԱԲ-ի հատման ոլորտում միջազգայնորեն մրցունակ գիտահետազոտական և կրթական կարողություններ և 7 տարիների արդյունքում նախատեսվում է առնվազն 14 մլն դոլարի ներդրում՝ կեսը՝ պետության, կեսը՝ մասնավորի կողմից։

Տեղեկացնելով, որ առաջին տարում պետությունը կհատկացնի 168,4 մլն դրամ, նա նշեց, թե այն կուղղվի գիտնականների վարձատրության բազային։