Փաշինյանն իրականում ընդդիմությանը փորձում է մղել «փակուղի». Քաղաքական վերլուծաբան

Քաղաքական վերլուծաբան Հակոբ Բադալյանը, անդրադառնալով «Ուժեղ Հայաստան» կուսակցության առաջնորդների, ներկայացուցիչների տներում զանգվածային խուզարկությունների վերաբերյալ Նարեկ Կարապետյանի հայտարարություններին, գրում է.

«Նարեկ Կարապետյանը լրագրողներին ասում է՝ «մեզ հիմա Փաշինյանը համոզում է․․․»։ Հասկանալի է, որ նա նկատի ունի չակերտավոր իմաստով։ Այլ կերպ ասած, փորձում է ճնշել եւ ահաբեկել, ցույց տալու համար, որ, եթե չընդունեն Սահմանադրության վերաբերյալ իշխանության առաջարկը, ապա կլինի հետապնդում։

Ամբողջ հարցն այն է, որ, երբ այս մեթոդներով է Փաշինյանը փորձում «համոզել» ընդդիմությանը, ապա ըստ էության ընդդիմությանը «զրկում» է այսպես ասած համոզվելու հնարավորությունից, որովհետեւ ընդդիմադիր ուժերը անկասկած կկորցնեն, եթե իրավապահ–ուժային ճնշումից հետո «համոզվեն»։

Ստացվում է, որ Փաշինյանն իրականում ընդդիմությանը փորձում է մղել «փակուղի»։ Այդ կերպ թերեւս նա փորձում է առնվազն ստեղծել «հավասարություն»։ Նա ինքը քաղաքական փակուղում է, ուր նրան մղել է ընդդիմիությունը հունիսի 7–ին։ Փաշինյանը չունի առանձնապես խոսուն ելքեր։ Ըստ այդմ «ելք» դիտարկում է առնվազն իր հերթին էլ ընդդիմությանը «փակուղի» մղելը։ Այսինքն, ընդդիմությունը չի կարող աջակցել Սահմանադրության նախագծին, մյուս կողմից՝ Փաշինյանի հադուգն քայլերը ստեղծում են էմոցիոնալ բավականին բարձր ֆոն եւ ընդդիմության ուժերին դնում են այդ ֆոնի «ճնշման» տակ, ստիպելով դուրս գալ ռացիոնալ հաշվարկով քաղաքական պայքարից եւ ավելի շատ ենթարկվել պահի թելադրանքով քայլերի։

Ինչպե՞ս չհայտնվել փակուղում։ Սա ընդդիմադիր ուժերի համար կարեւոր խնդիր է, ընդ որում՝ թերեւս լուծելի, չնայած բավականին ջանք եւ խորաթափանց աշխատանք պահանջող»։