Արամ Ա կաթողիկոսն օրհնել է Մայրավանքի կիրակնօրյա վարժարանի սաներին՝ ուսումնական տարվա մեկնարկի առթիվ

Մայրավանքի կիրակնօրյա դպրոցը տարեմուտի առիթով ստացել է Վեհափառ Հայրապետի օրհնությունը․

Մայրավանքի Կիրակնօրեայ վարժարանը 2026-2027 տարեշրջանը սկսաւ 25 Հոկտեմբեր 2026-ին: Արդարեւ, Կիրակի, 1 Նոյեմբեր 2026-ին, յաւարտ Սուրբ եւ Անմահ Պատարագին, Քրիստոնէական Դաստիարակութեան Բաժանմունքի վարիչ եւ կիրակնօրեայ վարժարաններու տեսուչ Գերպ. Տ. Ստեփանոս Ծ. Վրդ. Փաշայեանի առաջնորդութեամբ եւ Մայրավանքի կիրակնօրեայ վարժարանի տնօրէն Ժանին Դանիէլեան Մարգարեանի գլխաւորութեամբ, տնօրէնութիւն, ուսուցչակազմ, աշակերտութիւն եւ ծնողներ ստացան Ն.Ս.Օ.Տ.Տ. Արամ Ա. Կաթողիկոսին օրհնութիւնը:

Խօսք առնելով Մայրավանքի տնօրէնը՝ դիտել տուաւ, որ 2026 տարուան Հայրապետին հռչակագիրը՝ «Հոգեւոր Կեանքի Վերանորոգման Տարի», լայն կերպով կ՚անդրադառնայ Քրիստոսը մեր կեանքի կեդրոնը դարձնելու եւ մեր հաւատքը ապրելու հրամայականին։ Ան նշեց, որ Մայրավանքի կիրակնօրեայ դպրոցը միշտ վայելած է ու կը վայելէ Նորին Սրբութեան անմիջական հայրական խնամքն ու գուրգուրանքը: Վերջապէս, Ժ. Դանիէլեան ծնողներուն խօսքը ուղղեց՝ գնահատելով զանոնք իրենց զաւակները եկեղեցի եւ կիրակնօրեայ դպրոց առաջնորդելուն համար:

Ապա, Վեհափառ Հայրապետը իր ջերմ գնահատանքը եւ ուրախութիւնը յայտնեց տարուած աշխատանքին համար եւ փառք տուաւ Աստուծոյ, որ անգամ մը եւս առիթ ընծայեց Մայրավանքի կիրակնօրեայ վարժարանի ընտանիքին հաւաքուելու եւ իրենց վերամուտը սկսելու: Փոքրիկներով ու անոնց ծնողներով շրջապատուած՝ Արամ Ա. Կաթողիկոս օրհնեց ներկաները եւ բարի վերամուտ մաղթեց բոլորին:

Նշենք, կիրակնօրեայ վարժարանի փոքրիկները գեղարուեստական յատուկ յայտագիր մը պատրաստած էին Վեհափառ Հայրապետին համար: Անոնք Հայրապետին ներկայացուցին փունջ մը իրենց սորված շարականներէն, սաղմոսներէն, երգերէն եւ նուագներէն: