ԱՄՆ ռազմական փորձագետը ադրբեջանամետ գիրք է գրել 44-օրյա պատերազմի մասին

Ադրբեջանի նախագահ Իլհամ Ալիևի կողմից 44-օրյա Հայրենական պատերազմի ընթացքի մասին հանրությանը պարբերաբար իրազեկելը, ռազմաճակատում իրավիճակի զարգացման անձնական վերահսկողությունն ու Ղարաբաղ այցելությունները կարևոր դեր են ունեցել տեղեկատվական պատերազմում երկրի հաջողության ապահովման գործում։

Այս մասին հայտարարել է ԱՄՆ ռազմական ակադեմիայի ժամանակակից պատերազմի ինստիտուտի քաղաքային պատերազմի հետազոտությունների բաժնի ղեկավար և Քաղաքային պատերազմի ուսումնասիրության նախագծի համատնօրեն Ջոն Սփենսերը՝ «Պատերազմը Ղարաբաղի համար. ռազմավարություն, տեխնոլոգիաներ և հաղթանակ» գրքի շնորհանդեսի ժամանակ։

Սփենսերի խոսքով՝ զինված հակամարտությունների ելքը պայմանավորված է ոչ այնքան տեխնոլոգիաներով, որքան մարդկային գործոնով։ 

Նա նշել է, որ հետազոտության շրջանակում Լիամ Քոլինզի հետ բազմաթիվ հարցազրույցներ է անցկացրել ռազմական գործողությունների մասնակիցների՝ դիվիզիաների հրամանատարներից մինչև շարքային զինծառայողներ։ Բացի այդ, հեղինակներն այցելել են այն շրջանները, որտեղ իրականացվել են ռազմական գործողությունները։

«Մենք մի քանի անգամ այցելել ենք այս տարածաշրջան։ Իմ առաջին այցը տեղի է ունեցել 2021 թվականին, երբ ուսումնասիրում էի Շուշիի ճակատամարտը։ Այն վճռորոշ նշանակություն ունեցավ և ապահովեց Ադրբեջանի հաղթանակը։ Հետագայում մենք ևս հինգ անգամ վերադարձանք՝ այցելելու գրքում նկարագրված մյուս մարտադաշտերը»,- ասել է Սփենսերը։