Ադրբեջանի ծրագիրը այս պահին գոնե ձախողվել է. Է. Շարմազանով

«Թուրքիան այն երկիրն է, որը բացահայտ սատարում է Ադրբեջանի իշխանությունների հանցագործ, ագրեսիվ քաղաքականությանը։ Այսօր ԵԱՀԿ Մինսկի խմբի համանախագահող երկրներից մեկի արտգործնախարարը փաստեց, որ Թուրքիայի կոչերը ոչ թե խաղաղության, այլ ավելի շատ պատերազմի կոչեր էին։ Մեր կարծիքը չի փոխվել, որոշողը լինելու է Ղարաբաղի ժողովուրդը, բայց այս փուլում խոսել բանակցությունների մասին վաղ է, որովհետև դրա համար պետք է սպառազինության բալանսավորում ու գիտակցում, որ Ադրբեջանը չի գնա երկրորդ անգամ նման ահաբեկչական գործողությունների»,- ՀՀԿ գործադիր մարմնի նիստից հետո լրագրողերի հետ հանդիպմանը հայտարարեց ՀՀԿ խոսնակ Էդուարդ Շարմազանովը:

ՀՀԿ խոսնակը նաև նշեց, որ հայկական կողմը հերոսների կյանքի գնով կարողացավ ռազմաճակատում չեզոքացնել ադրբեջանական սպառնալիքը և այսօր էլ դիվանագիտական ասպարեզում արձանագրեց. «Ադրբեջանի ծրագիրը՝ դուրս գալ զինադադարից ու բերել նոր փաստաթուղթ, այս պահին գոնե ձախողված է»։

Հարցին, թե Սերժ Սարգսյան-Լավրով հանդիպման ժամանակ արդյոք քննարկվել է ՌԴ-ի կողմից Ադրբեջանին սպառազինելու հարցը, և ապրիլյան գործողությունների վերսկսման հավանականությունը որքան է կազմում, Էդուարդ Շարմազանովը պատասխանեց, որ ոչ ՀՀ-ն, ոչ էլ ԼՂՀ-ն երաշխիքներ տալ չի կարող, որովհետև նախահարձակ կողմը Ադրբեջանն է։