Ռուսաստանը առաջարկներ դեռևս չունի ու ոչ էլ խոսում է դրանց մասին. Հրանտ Մելիք-Շահնազարյան

Ըստ էության՝ Լավրովի հայտարարություններում նորություն չկար:

Newspress.am-ի հետ զրույցում խոսելով ՀՀ և ՌԴ արտաքին գործերի նախարարների համատեղ ասուլիսից և մասնավորապես անդրադառնալով Սերգեյ Լավրովի ելույթին, ասաց քաղաքագետ Հրանտ Մելիք-Շահնազարյանը:

«Տեղի է ունեցել ռազմական գործողությունների վերսկսում, և պարզ է, որ այս պահին Ռուսաստանը նշում է իր առաջնահերթությունները»,- ասում է քաղաքագետը՝ ընդգծելով, որ այն դեռ միայն հակամարտությունը նորից սառեցնելու գաղափարին է վերաբերում:

«Դատելով Լավրովի հայտարարություններից՝ Ռուսաստանի համար առաջնահերթությունը, որպես այդպիսին, հրադադարի ռեժիմի ամրապնդումն է և վստահության մեխանիզմների ստեղծումը, այսինքն՝ նորից սառեցումը: Սակայն սա խոսում է միայն կարգավորման մեխանիզմի մասին. Ռուսաստանը առաջարկներ դեռևս չունի ու ոչ էլ խոսում է դրանց մասին»,-ասաց Մելիք-Շահնազարյանը:

Ըստ քաղաքագետի` Լավրովի հայտարարության մեջ միակ նորությունն այն էր, որ Ռուսաստանը կողմնակից է պահպանել 1994-95 թթ-ի ձեռք բերված հրադադարի պայմանավորվածությունը, որը եռակողմ պայմանավորվածություն էր, որտեղ Արցախի հանրապետությունը ներկայացել է որպես առանձին կողմ:

«Ադրբեջանն ամեն ինչ անում էր, որ չօգտագործվի այս առիթը և հրաժարվի այս պայմանավորվածությունից, Ադրբեջանի պատվիրակությունը ԵԱՀԿ անդամ պետությունների առաջ Վիեննայում նոր պայմանագրի խնդիր էին բարձրաձայնում, սակայն տեսանք, որ այս հարցում Ռուսասատանը պաշտպանում է Հայաստանի դիրքորոշումը: Սա նաև նշանակում է, որ Ռուսաստանը կողմ է Արցախը տեսնելու բանակցային գործընթացի մեջ … սա լավ նորություն է»,- ասաց Մելիք-Շահնազարյանը՝ հավելելով, որ ադրբեջանական ագրեսիայից հետո սա այն մինիմալն էր, որը կարելի է ակնկալել թե՛ Ռուսաստանից, թե՛ միջնորդ այլ պետություններից:

Ինչ վերաբերում է Հայաստանի քաղաքականությանը, ապա քաղաքագետը վստահեցնում է, որ հարկավոր է մեր քաղաքական դիրքորոշումները ներկայացնել բանակցային սեղանի շուրջ և հասնել նրան, որպեսզի Ադրբեջանի զսպող մեխանիզմները իսկապես գործուն ու ավելի աշխատող լինեն, իսկ Արցախը դառնա բանակցային կողմ: