ԵԱՏՄ-ն առաջարկում է Աֆրիկայում ներկայացնել իր միասնական շուկայի հնարավորությունները

Եվրասիական տնտեսական հանձնաժողովի կոլեգիայի նախագահ Բակիտժան Սագինտաևը հոկտեմբերի 28-ին Մոսկվայում մասնակցել է Ռուսաստանի նախագահ Վլադիմիր Պուտինի հանդիպմանը Աֆրիկայի տարածաշրջանային կազմակերպությունների ղեկավարների հետ։

Հանդիպման ընթացքում տեղի է ունեցել կարծիքների հանգամանալից փոխանակում աշխարհում ինտեգրացիոն համագործակցության արդիական հարցերի, այդ թվում՝ եվրասիական և աֆրիկյան տարածքների փոխգործակցության վերաբերյալ։

Բակիտժան Սագինտաևը նշել է, որ վերջին տասը տարում Եվրասիական տնտեսական միության համախառն ներքին արդյունքն աճել է 20 տոկոսով՝ գերազանցելով 3 տրիլիոն դոլարը։

Արդյունաբերական արտադրության ծավալը հասել է 1,7 տրիլիոն դոլարի՝ աճելով գրեթե մեկ երրորդով։ Հիմնական կապիտալում ներդրումներն ավելացել են ավելի քան 40 տոկոսով և 2025 թվականի արդյունքներով կազմել 580 միլիարդ դոլար։

ԵՏՀ-ն հետևողականորեն ընդլայնում է առևտրատնտեսական համագործակցության աշխարհագրությունը՝ զարգացնելով անմիջական կապերը տարածաշրջանային տնտեսական միավորումների, այդ թվում՝ աֆրիկյան մայրցամաքի կազմակերպությունների հետ։

«2015-2025 թվականներին ԵԱՏՄ հնգյակի ապրանքաշրջանառությունն աֆրիկյան երկրների հետ ավելի քան կրկնապատկվել է՝ գերազանցելով 25 միլիարդ դոլարը։ 2026 թվականի սկզբից այս ցուցանիշն աճել է ևս 9 տոկոսով՝ կազմելով շուրջ 17 միլիարդ դոլար»,– իր ելույթում ընդգծել է ԵՏՀ կոլեգիայի նախագահը։

Աֆրիկյան արտահանողների աջակցության կարևոր գործիքներից է ԵԱՏՄ միասնական սակագնային արտոնությունների համակարգը, որի առավելություններից օգտվում է 47 երկիր։

ԵՏՀ-ն առանձնահատուկ նշանակություն է տալիս նաև Աֆրիկյան միության հանձնաժողովի հետ երկխոսությանը։ Ներկայումս համաձայնեցվում է համագործակցության նոր հուշագրի նախագիծը։

Նման աշխատանք է տարվում նաև Արևելյան Աֆրիկայի համայնքի, Կենտրոնական Աֆրիկայի պետությունների տնտեսական համայնքի, Արևելյան և Հարավային Աֆրիկայի ընդհանուր շուկայի, Արևմտյան Աֆրիկայի պետությունների տնտեսական համայնքի և մի շարք այլ կազմակերպությունների հետ։

Եվրասիական տնտեսական հանձնաժողովը գործնական համագործակցության հեռանկարներ է տեսնում արդյունաբերական կոոպերացիայի, տեխնիկական կարգավորման, առևտրային ընթացակարգերի պարզեցման, տրանսպորտային լոգիստիկայի և թվայնացման ոլորտներում։

Երկխոսության հետագա ամրապնդման նպատակով Բակիտժան Սագինտաևն առաջարկել է Աֆրիկյան միության հանձնաժողովի հարթակում կազմակերպել «ԵԱՏՄ օրեր» միջոցառումը։ Այն հնարավորություն կտա ներկայացնել Միության ձեռքբերումները, միասնական շուկայի հնարավորություններն ու առևտրատնտեսական համագործակցության հեռանկարները։