«Քաղաքական հոգեհանգիստ» և վերահաս կոլապս. ի՞նչ է սպասվում իշխող ուժին. «Փաստ»

«Փաստ» օրաթերթը գրում է.

 Հայաստանն այսօր թևակոխել է մի փուլ, որտեղ միաժամանակյա ճնշումները տարբեր ճակատներից սպառնում են խաթարել պետականության հիմքերը։ Երկրի տնտեսության գլխին կախված է ռուսական բնական գազի գնի հնարավոր թանկացման վերահաս աղետը, որն անխուսափելիորեն հանգեցնելու է ապրանքների ու ծառայությունների շղթայական թանկացումների՝ հասարակությանն ու տնտեսական համակարգը կանգնեցնելով լիակատար կոլապսի առջև։ Սրան զուգահեռ՝ արտաքին քաղաքական ասպարեզում խաղաղության գործընթացի անորոշ, մշուշոտ ու օրեցօր խամրող ապագան, ինչպես նաև անվտանգային լրջագույն մարտահրավերները երկրում ձևավորում են խոր ապոկալիպտիկ տրամադրություններ։ Հասարակությունն ապրում է անհերքելի ճգնաժամի և անորոշության ծանր մթնոլորտում, որտեղ սոցիալական դժգոհությունները հասնում են իրենց օրհասական պիկին։

 Այս խորապատկերին, դատարանի բակում լրագրողների հետ զրույցում «Ուժեղ Հայաստան» կուսակցության նախագահ Սամվել Կարապետյանը անդրադարձել է երկրում առկա հրատապ խնդիրներին։ Նա մասնավորապես նշել է, որ գազի հնարավոր թանկացումն ուղղակիորեն բխում է վարչապետի գործելաոճից, որն, ըստ էության, բանակցում է ոչ թե գինը կանխելու, այլ այն բարձրացնելու ուղղությամբ՝ նպատակ ունենալով ևս մեկ անգամ աղքատացնել արդեն իսկ սոցիալական ծանր պայմաններում գտնվող հայ ժողովրդին։

Կարապետյանի դիտարկմամբ, սա ունի նաև քաղաքական հաշվարկ, քանի որ իշխանության հիմնական ընտրական հենարանն այսօր այն համայնքներն ու մարդիկ են, որտեղ աղքատության մակարդակը գերազանցում է 50 տոկոսը։

Անդրադառնալով ներքաղաքական զարգացումներին՝ Կարապետյանը շեշտել է, որ հոկտեմբերի 25-ի տեղական ինքնակառավարման մարմինների ընտրությունները փաստացի պարտություն էին իշխող ուժի համար։ Նա հավելել է, որ իշխանությունների այն պնդումները, թե ընդդիմությունը ջախջախվել է, բացարձակապես սնանկ են, իսկ այս ընտրությունները հիշեցնում են քաղաքական «հոգեհանգիստ», որից մի քանի ամիս անց անխուսափելիորեն սկսվելու է իշխանափոխության գործընթացը։

 Խոսելով հնարավոր արտահերթ խորհրդարանական ընտրությունների մասին՝ Կարապետյանը թերահավատորեն է վերաբերվել դրանց իրականացմանը՝ հիշեցնելով, որ իշխանություններին նախկինում հսկայական՝ շուրջ 1 միլիարդ դոլար ռեսուրսներ ծախսելով է հազիվ հաջողվել ապահովել ձայների մոտ 49 տոկոսը։ Նա ընդգծել է, որ Հայաստանում այսօր առկա է ոչ թե պարզապես ընդդիմափոխության, այլ համակարգային իշխանափոխության հրամայական, քանի որ երկրին անհրաժեշտ են բացառապես պետականամետ իշխանություններ՝ ի հակադրություն այն ուժերի, որոնք ի վիճակի չեն դիմակայել արտաքին մարտահրավերներին։ Զրույցի ավարտին Կարապետյանը վստահություն է հայտնել, որ անգամ արտահերթ ընտրությունների սցենարի դեպքում հաղթանակը լինելու է իրենց թիմինը։

Ամփոփելով ստեղծված իրավիճակը՝ ակնհայտ է դառնում, որ Հայաստանը հայտնվել է մի հանգուցալուծման առջև, որտեղ տնտեսական ճնշումներն ու քաղաքական անգործությունը սպառնում են վերածվել անդառնալի պետական աղետի։ Գազի գնի սպասվող բարձրացումը միայն տնտեսական ցուցանիշ չէ. դա սոցիալական պայթյունի և հասարակության վերջնական աղքատացման ռումբ է, որն ավելի է խորացնում իշխանության նկատմամբ վստահության դեֆիցիտը։ Քաղաքական դաշտում ընթացող խմորումները, ՏԻՄ ընտրությունների արդյունքներն ու ընդդիմադիր գործիչների կոշտ գնահատականները ցույց են տալիս, որ գործող համակարգն այլևս ի վիճակի չէ կառավարել ճգնաժամը կամ հանրությանը առաջարկել ապագայի հուսալի տեսլական։ Երկրում ստեղծված սոցիալ-տնտեսական ու քաղաքական ֆոնը փաստում է, որ մակերեսային քայլերով կամ կարճաժամկետ մանիպուլ յացիաներով այլևս անհնար է զսպել խորացող դժգոհությունները, և հանրային պահանջը գնալով ավելի հստակ է ձևակերպում արմատական ու պետականակենտրոն փոփոխությունների անհրաժեշտությունը։

Մանրամասները՝ «Փաստ» օրաթերթի այսօրվա համարում