Եվրահանձնաժողովը բացառել է ռուսական գազի վերադարձը ԵՄ նույնիսկ Ուկրաինայում խաղաղության հաստատումից հետո

Եվրահանձնաժողովը բացառել է Եվրամիության երկրների կողմից ռուսական գազի գնումների վերսկսման հնարավորությունը նույնիսկ Ուկրաինայի հարցով խաղաղության համաձայնագրի կնքումից հետո։

ԵՄ գործող օրենսդրությունը նախատեսում է ռուսական գազից աստիճանական հրաժարում, և այդ որոշումը կախված չէ պատերազմի ընթացքից կամ հնարավոր քաղաքական պայմանավորվածություններից, հոկտեմբերի 28-ին Բրյուսելում անցկացված ճեպազրույցում հայտարարել է Եվրահանձնաժողովի պաշտոնական ներկայացուցիչ Պաուլա Պինյուն։

«Մեզ մոտ գործում է օրենսդրություն, որը թույլ չի տալիս վերսկսել Ռուսաստանից հանածո վառելիքի, մասնավորապես՝ գազի ներմուծումը»,- ընդգծել է Պինյուն՝ պատասխանելով «Հյուսիսային հոսք» գազատարի աշխատանքի հնարավոր վերսկսման մասին հարցին։

Եվրահանձնաժողովի՝ էներգետիկայի հարցերով ներկայացուցիչ Աննա-Կայսա Իտկոնենը հիշեցրել է, որ ԵՄ-ն արդեն ընդունել է ռուսական խողովակաշարային և հեղուկացված բնական գազի ներմուծումն աստիճանաբար դադարեցնելու մասին օրենքը։ Ըստ հաստատված ժամանակացույցի՝ հեղուկացված բնական գազի մատակարարումների լիակատար արգելքը պետք է ուժի մեջ մտնի 2027 թվականի սկզբից, իսկ խողովակաշարային գազինը՝ 2027 թվականի աշնանը։

Հայտարարությունը հնչել է այն տեղեկությունների հետնապատկերին, ըստ որոնց ԱՄՆ նախագահ Դոնալդ Թրամփի վարչակազմն Եվրոպային առաջարկել է վերսկսել ռուսական գազի գնումները՝ Ուկրաինայում պատերազմի հնարավոր կարգավորման շրջանակում։ Այդ նախաձեռնության մասին ավելի վաղ հայտնել էր The New York Times պարբերականը։ Եվրահանձնաժողովը մերժել է ռուսական էներգառեսուրսներին նման վերադարձի հնարավորությունը։