Սահմանային լարվածությունը չի խանգարում Ընտրական օրենսգրքի քննարկմանը

«Հիմնականում այն մարդկանց ուշադրությունն է սևեռված սահմանի վրա, որոնք ունեն ծառայողներ, կամ բարեկամներ Արցախում, իսկ մնացածի ուշադրությունը սևեռված է արտագաղթի, գումար հայթայթելու իրենց կյանքը բարելավելու ուղղությամբ կամ արդյոք կշահեն գրինքարդ, թե ոչ»,-newspress.am -ի հետ զրույցում ասաց քաղտեխնելոգ Արմեն Բադալյանը:

Ըստ նրա՝ բնական է, որ այս օրերին քաղաքական գործիչներից շատերը ակտիվորեն քննարկում են նոր ընտրական օրենսգիրքը, քանի որ և ներքին, և արտաքին քաղաքական հարցերը պետք է ուշադրության կենտրոնում պահել՝ անկախ սահմանում տիրող իրավիճակից. «Եթե քաղաքական ուժերը համապատասխան աշխատանք տանեն ընտրակեղծիքներ չլինելու ուղղությամբ, բնականաբար, դրանք չեն լինի, իսկ եթե այն ուժերը, որոնք շահագրգռված են, որ ընտրակեղծիքներ չլինեն, համապատասխան աշխատանքներ չտանեն, ապա ընտրությունները կեղծիքով տեղի կունենան նույն Ընտրական օրենսգրքով: Ընտրական օրենսգիրքը այդ գործընթացի արտաքին, ձևական կողմն է, ոչ էությունը»,- մանրամասնեց նա:

Արմեն Բադալյանի դիտարկմամբ ՝ եթե ցանկություն լինի ընտրությունները կեղծելու, ընտրական օրենսգրքի որակը կապ չի ունենա. «Իհարկե, դա չի նշանակում, որ չպետք է աշխատել Ընտրական օրենսգրքի վրա. ո՛չ, պետք է աշխատել, բայց դա, կարելի է ասել, ընտրական գործընթացի 1 տոկոսն է միայն, ոչ ավելին»,-եզրափակեց նա: