Եթե նման հայտարարություն ՀՀԿ իշխանությունն աներ, մեզ անարգանքի սյունին կգամեին․ Շարմազանով

ՀՀԿ ԳՄ անդամ Էդուարդ Շարմազանովը արձագանքել է Նիկոլ Փաշինյանի հայտարարությանը, թե Հայաստանում «պետք է ձևավորվի նոր ընդդիմություն»։

Շարմազանովն, ի պատասխան, նշել է․

«ՀՀ-ին պետք է ոչ այնքան պետակենտրոն ընդդիմություն, որքան՝ պետակենտրոն իշխանություն։

Թե բա՝ «ՀՀ ոչ իշխանական պետականակենտրոն ուժերը պետք է ակտիվանան. մենք բնականաբար իրենց չենք կարող աջակցել, օգնել, բայց ոչ մի բանով չենք խանգարի: Շահագրգռված ենք, որ ՀՀ-ում ձևավորվի ընդդիմություն, որը գործում է ՀՀ-ի, ժողովրդի շահերի վրա հիմնվելով»։

Չենք խանգարի՞…այսինքն ընդունու՞մ եք, որ խանգարում եք այսօր ընդդիմությանը, իսկ ձեր սրտի «ապագա ընդդիմությանը» չեք խանգարի։

Փաստորեն, նիկոլիզմի իշխանությանը զուգահեռ, հիմա էլ անցնում եք նիկոլական ընդդիմություն ստեղծելու փուլ, հա՞։

Բա «ժողովրդավարության բաստիոն» էիք, ու՞ր մնացին ազատ մրցակցությունը, հավասար հնարավորությունները։

Իսկ ԵՄ-ից ձեն-ձուն չկա՞․ բա եթե նման հայտարարություն ՀՀԿ իշխանությունն աներ, մեզ անարգանքի սյունին կգամեին ԵՄ «ժողովրդավարության ջատագովները»։

Ցինիզմը դարձել է բացահայտ ու նողկալի, իսկ այդ ժամանակ ՔՊ-ն փաստացի ձեռնամուխ է լինելու իր սրտի ընդդիմության ձեւավորմանը։

Ինչու՞, որպեսզի միասին հաշտ ու համերաշխ «ջան ասեն ու ջան լսեն»՝ պետությունը տանելով կանխատեսվող ադրբեջանացմա՞ն։

Մեր պետությանն ու ժողովրդին ոչ թե ընդդիմափոխություն է պետք, այլ  իշխանափոխություն։

Իսկ պետության շահերից է բխում ունենալ ոչ թե Անկախության հռչակագրից «ձեռքերը լվացող» իշխանություն, այլ ՀՀ ու հայ ժողովրդի հավաքական շահը գիտակցող ու պաշտպանող նոր իշխանություն»։