Ի վերջո ե՞րբ պատրաստ կլինի Վարդենիս Մարտակերտ ճանապարհը

Երբ նախատեսվում էր կառուցել Վարդենիս-Մարտակերտ ճանապարհը ակնկալվում էր, որ այն շատ արագ իրականություն կդառնա, սակայն ինչպես ժամանակը ցույց տվեց, շինարարությունը դանդաղ է ընթանում, միշտ փողը չի բավարարում և այլն:

«Հայաստան» համահայկական հիմնադրամի «Հեռուստամարաթոն-2014»-ի ընթացքում հանգանակված 12 մլն 399 հազար 550 դոլար գումարն ուղղվել է Վարդենիս-Քարվաճառ-Մարտակերտ ռազմավարական նշանակություն ունեցող ճանապարհի վերականգնմանը, նախորդ տարվա գումարը ևս ուղղվել է ճանապարհաշինությանը:

Նշենք, որ այս ռազմավարական ճանապարհն ունի 116 կմ երկարություն և 10 մ լայնություն, որից երթևեկելի (ասֆալտապատ) մասը կլինի 7 մետր (մյուս հատվածները հողապատ կողնակներն են): ՀՀ Տրանսպորտի և կապի նախարարությունը պատասխանատու է Վարդենիս-Քարվաճառ-Մարտակերտ ճանապարհի միայն մի փոքր` մոտ 13կմ երկարությամբ հատվածի համար:

Ճանապարհի կառուցապատման մրցույթը շահել են արցախյան 6 կազմակերպություն. 1. «Կապավոր» ՍՊԸ ` Վարդենիս-Սոթք տեղամաս` 22.05 կմ, 2. «Դորոժնիկ» ՍՊԸ ` Սոթք-Քարվաճառի խաչմերուկ տեղամաս` 17.85 կմ, 3. «Վրեժ» ՓԲԸ` Սոթք-Քարվաճառի խաչմերուկ տեղամաս` 8.47 կմ, 4. «Քարավան» ՍՊԸ` Քարվաճառի խաչմերուկ-Դրմբոն տեղամաս` 32.4 կմ, 5. «Վիրաժ» ԱԿ `Քարվաճառի խաչմերուկ-Դրմբոն տեղամաս` 10.4 կմ, 6. «Ճանշին» ՓԲԸ ` Դրմբոն-Մարտակերտ տեղամաս`14.9 կմ:

Ճանապարհի ընդհանուր արժեքը նախնական հաշվարկներով կազմում է շուրջ 13 միլիարդ ՀՀ դրամ:

Երևան-Գորիս-Ստեփանակերտ մայրուղուց հետո սա երկրորդ ճանապարհն է, որն իրար է կապում ՀՀ-ն ու ԼՂՀ-ն: Այս մայրուղին առաջին հերթին կարևոր է ԼՂՀ Մարտակերտի ու Շահումյանի շրջանների համար, որոնք տնտեսական առումով կապված են հատկապես ՀՀ Վարդենիսի ու Մարտունու տարածաշրջանին: Մոտ 30 գյուղ կստանան տնտեսական զարգացման հեռանկար, նաև գրեթե երեք անգամ կկրճատվի դեպի Արցախ ճանապարհը:

Հիշեցնենք, որ ապիրլյան քառօրյա պատերազմից հետո կառավարությունը պահուստային ֆոնդից 1 մլրդ դրամ հատկացնել Հայաստան համահայկական հիմնադրամին՝ ռազմավարական նշանակություն ունեցող Վարդենիս-Մարտակերտ ճանապարհի կառուցման աշխատանքների համար:

Հիմա այս ռազմավարական ճանապարհի որ հատվածն է կառուցվածը, որը՝ ոչ, չի հաղորդվում: Միայն ժամանակ առ ժամանակ հաղորդվում է ճանապարհի կարևորության մասին, իսկ թե վերջապես երբ պատրաստ կլինի: Երևի կապրենք` կտեսնենք: