Իրանին խորհուրդ կտայինք զբաղվել սեփական երկրի խնդիրներով և չմիջամտել այլ պետությունների ներքին գործերին. Ադրբեջանի կրթության նախարարություն

Իրանի գիտության, հետազոտությունների և տեխնոլոգիաների նախարար Հոսեյն Սիմայի-Սարրաֆի հայտարարությունը Ադրբեջանում կրթության հարցերի վերաբերյալ զարմանք և ափսոսանք է առաջացնում։

Այս մասին նշված է Ադրբեջանի գիտության և կրթության նախարարության հայտարարության մեջ։

Գերատեսչությունը հայտարարությունը համարում է լիովին անտեղի՝ այն որակելով որպես Ադրբեջանի ներքին գործերին միջամտելու փորձ։

«Ոչ ոքի թույլ չի տրվում միջամտել մեր երկրի ներքին գործերին, այդ թվում՝ կրթական քաղաքականությանը, և նման փորձերը վճռականորեն կանխվում են։ Իրանի պաշտոնյաներին խորհուրդ կտայինք զբաղվել սեփական երկրի խնդիրներով և չմիջամտել այլ պետությունների ներքին գործերին»։

Հայտարարության մեջ նաև նշվում է, որ Իրանում չկա որևէ դպրոց, որտեղ ուսուցումն իրականացվի ադրբեջաներենով։

«Երկրի բարձրագույն ուսումնական հաստատություններում նույնպես ադրբեջաներենով ուսուցում չի իրականացվում, չնայած այն հանգամանքին, որ Իրանի բնակչության շուրջ 40 միլիոնը էթնիկ ադրբեջանցիներ են։ Տասնամյակներ շարունակ նրանք զրկված են մնում իրենց մայրենի լեզվով կրթություն ստանալու իրավունքից: Ավելի լավ կլիներ, եթե Իրանի գիտության, հետազոտությունների և տեխնոլոգիաների նախարարն ու մյուս պաշտոնյաները միջոցներ ձեռնարկեին այս երկարամյա անարդարությունը վերացնելու համար՝ Ադրբեջանի ներքին գործերին միջամտելու փոխարեն»,-նշված է հայտարարությունում: