Թուրքիան քառօրյա պատերազմի ընթացքում հարցը ռազմական ճանապարհով լուծելու կոչեր էր անում

Թուրքական իշխանությունների կողմից ղարաբաղյան քառօրյա պատերազմի ընթացքում հնչեցրած հայտարարությունները հարցը ռազմական ճանապարհով լուծելու կոչեր էին: Այդ մասին Նալբանդյան-Լավրով համատեղ ասուլիսի ժամանակ հայտարարեց ՌԴ ԱԳ նախարարը:

«Հայտարարությունները, որոնք հնչել են թուրքական ղեկավարության շուրթերից, անընդունելի են, որովհետև դրանք կոչեր էին, ոչ թե ուղղված խաղաղությանն, այլ՝ պատերազմին։ Դրանք կոչեր էին՝ լուծել հակամարտությունը ռազմական ճանապարհով։ Դա արմատապես հակասում է Մինսկի խմբի մոտեցմանը, արմատապես հակասում է միջազգային հանրության դիրքորոշմանը։ Մենք, ցավոք, սովոր ենք թուրքական իշխանությունների այս կեցվածքին»,- ասաց Սերգեյ Լավրովը:

Պատասխանելով հարցին, թե կոնկրետ ի՞նչ քայլեր են կատարվում ԼՂ հակամարտության լուծման ուղղությամբ, Սերգեյ Լավրովը պատասխանեց. «Մենք սկզբունքորեն կարևորում ենք անել ամեն ինչ, որ թույլ չտանք խախտել կողմերի միջև ձեռքբերված պայմանավորվածությունը հրադադարի մասին, որը կնքվել է 94-95-ին ու լիարժեքորեն ուժ ունի, գործում է։ Վերջին տարիներին Ռուսաստանի միջնորդությամբ համաձայնեցվել են քայլեր, որոնք պետք է կյանքի կոչվեն։ Դրանք վերաբերում են վստահության միջոցներին, ինչպես հետաքննական մեխանիզմը և այլ գործիքներ։ Դեռ հինգ տարի առաջ ԵԱՀԿ Մինսկի խումբը ճանապարհային քարտեզ էր մշակել՝ ինչպես շարժվել այս ուղղությամբ։ Մենք կարևոր ենք համարում, որ Գերմանիայի նախագահությունը ԵԱՀԿ-ում կենտրոնանա սրա վրա, օգտագործի իր լիազորություններն այս հարցում։ Մենք նպաստելու ենք դրան»,-ասաց Լավրովը: