Ի՞նչ է բացահայտել ՔՊ-ն Եղեգիսի համայնքապետի մասին, որ հեռացրել է կուսակցությունից․ «Ժողովուրդ»

«Ժողովուրդ» օրաթերթը գրում է.

««Ժողովուրդ» օրաթերթը երեկ գրել էր, որ «Քաղաքացիական պայմանագիր» կուսակցության վարչությունը որոշում է կայացրել Եղեգիսի համայնքապետ Արթուր Ստեփանյանին հեռացնել կուսակցությունից։

«Ժողովուրդ» օրաթերթի բացառիկ տեղեկություններով՝ կուսակցության ներսում Արթուր Ստեփանյանի հարցը քննարկվել է ավելի վաղ, և նրա հեռացման հետևում ոչ միայն կուսակցական կարգապահության, այլև քաղաքական հավատարմության հետ կապված խնդիրներ են։

Մեր աղբյուրների փոխանցմամբ՝ Արթուր Ստեփանյանի վարքագիծը լուրջ քննարկման առարկա է դարձել նաև ՔՊ վերահսկող հանձնաժողովում։

Իշխանական շրջանակներում կասկածներ են առաջացել, որ ՔՊ-ական համայնքապետը փորձել է քաղաքական «խաղեր տալ» իշխանության և ընդդիմության միջև՝ միաժամանակ պահպանելով իր դիրքերը իշխող կուսակցության ներսում։

Մասնավորապես, նախընտրական շրջանում Ստեփանյանը աջակցություն է ցուցաբերել «Ուժեղ Հայաստան» քաղաքական ուժին, որ խորհրդարանական ընտրություններում հաջողություն գրանցի ընդդիմությունը։ Ահա և դրա համար էլ պատժվեց։

Համայնքապետը թերևս կարծել է, որ խորհրդարանական ընտրություններից հետո իշխանության կգա «Ուժեղ Հայաստանը», և փորձել է այդ ուղղությամբ աշխատանքներ իրականացնել՝ միաժամանակ մնալով ՔՊ-ի կազմում։

Մեր տեղեկություններով՝ այս հանգամանքները քննարկվել են կուսակցության վերահսկող հանձնաժողովում, որտեղ համայնքապետին նկատողություն է արվել՝ նման վարքագիծ դրսևորելու անթույլատրելիության վերաբերյալ։

ՔՊ-ից մեզ փոխանցեցին, որ Ստեփանյանն իր բացատրություններում պնդել է, որ տեղի ունեցածը թյուրիմացության հետևանք է, իրեն սխալ տեղեկություններ են փոխանցել, և ինքը որևէ կերպ չի աջակցել ընդդիմադիր ուժին։ Սակայն կուսակցության ներսում հավաքված տեղեկությունները չեն փարատել կասկածները, և համոզմունք է ձևավորվել, որ համայնքապետը համագործակցել է ընդդիմադիր շրջանակների հետ։

Հիշեցնենք, որ Արթուր Ստեփանյանը Եղեգիս համայնքի ղեկավարն է, որը համայնքային կառավարման համակարգում երկար տարիների փորձ ունի։ Նա նախկինում ղեկավարել է Քարագլուխ համայնքը, իսկ 2017 թվականին դարձել է խոշորացված Եղեգիս համայնքի ղեկավար։ 2022 թվականի ՏԻՄ ընտրություններին առաջադրվել է ՔՊ ցուցակով։ Նրա քաղաքական անցյալը կապվել է նաև ԲՀԿ-ի և ՀՀԿ-ի հետ։

Հիշեցնենք, որ 2018 թվականի իշխանափոխությունից հետո համայնքի բնակիչները բողոքի ակցիաներ էին իրականացրել՝ դժգոհելով համայնքում աշխատանքների բացակայությունից, այդ թվում՝ ոռոգման ջրի խնդիրներից։ Բնակիչները շաբաթներ շարունակ փակել էին համայնքապետարանի մուտքը։

Ավելի ուշ՝ 2024 թվականին, Ստեփանյանին մեղադրանք էր առաջադրվել իրեն վստահված գույքի առանձնապես խոշոր չափերով հափշտակության և պաշտոնեական կեղծիքի վերաբերյալ գործով։ Հրապարակված տեղեկությունների համաձայն՝ քննվող ծրագիրը մոտ 100 միլիոն դրամ արժողությամբ ոռոգման համակարգի կառուցման մասին էր, իսկ համայնքին պատճառված ենթադրյալ վնասը գնահատվել էր շուրջ 25 միլիոն դրամ»։

Մանրամասները՝ «Ժողովուրդ» օրաթերթի այսօրվա համարում։