Բեգլարյանն իր և իր աշխատակցուհու համար ընտրել է ամենաթանկ տոմսերը. «ՀԺ»

«Տրանսպորտի եւ կապի նախարար Գագիկ Բեգլարյանը իր օգնական Աշխեն Մկրտչյանի հետ փետրվարի 22-ին 4 օրով մեկնել է Բարսելոնա։ Երեւան-Մոսկվա-Բարսելոնա-Մոսկվա-Երեւան 2 ավիատոմսի համար ՏԿ նախարարությունը վճարել է 1.320.000 դրամ։

Մինչդեռ եթե վաղը հետադարձով Բարսելոնայի 4-օրյա ուղեւորության էկոնոմ դասի տոմս գնենք, այն կարժենա 413-468 եվրո կամ 230-250 հազար դրամ։ Գրեթե նույն գներն են նաեւ տուրիստական ամենաթեժ օրերին։

Հիշեցնենք, կառավարության աշխատակազմի ղեկավար Դավիթ Հարությունյանը նախարարներին խիստ զգուշացրել էր պետական գումարները չվատնել եւ գնել միայն էկոնոմ դասի տոմսեր։ Վաղվա համար բիզնես դասի տոմսը արժի 720-1220 եվրո կամ 400-665 հազար դրամ։ Այսինքն, Բեգլարյանի գնած տոմսի գինը համապատասխանում է բիզնես դասի արժեքին, մինչդեռ կառավարության կայքում նշված է, որ գնվել է էկոնոմ դասի ավիատոմս։

ՏԿՆ-ի պարզաբանումը ցնցող էր. «Գնումների մասին օրենսդրությամբ սահմանված կարգով, ավիատոմսերը ձեռք բերելու համար հայտարարվում է մրցույթ եւ հաղթող է ճանաչվում ամենացածր առաջարկ ներկայացրած մասնակիցը։ Ձեր նշած գումարի չափը եւս ձեւավոովել Է մրցույթի արդյունքում»։ Այսինքն նախարարությունն այս հարցում 2 անգամ խաբում է: Բեգլարյանն ընտրել է ոչ թե Էժան, այլ ամենաթանկ տոմսերը, եւ տոմսերը գնելու համար մրցույթ չի հայտարարվել։ Կառավարության կայքի համաձայն այն ձեռք Է բերվել «մեկ անձից կատարվող գնումներ» տարբերակով»:

Առավել մանրամասն՝ թերթի այսօրվա համարում