Կարևոր փորձություն է սպասվում

«Դեմոկրատական այլընտրանք» կուսակցության նախագահ Սուրեն Սուրենյանցի գնահատմամբ՝ Գագիկ Ծառուկյանի գործը քաղաքական հետապնդման և սեփականության իրավունքի խախտման դրսևորում է։ Այս մասին նա հայտարարել է «Քաղաքական հետապնդումները Հայաստանում. ինչպե՞ս պայքարել դրանց դեմ» թեմայով քննարկման ընթացքում։

Սուրենյանցն անդրադարձել է Ծառուկյանի փաստաբանական խմբի՝ երկու օր առաջ հրապարակած տեսանյութին՝ նշելով, որ դրանում ներկայացված հանգամանքները բացահայտում են գործի հիմքում ընկած կեղծիքների ծավալը։ Նրա համոզմամբ՝ հրապարակված նյութերը հիմք են տալիս պնդելու, որ այս գործով Ծառուկյանը պետք է հանդես գար որպես տուժող, ոչ թե մեղադրյալ։

Քաղաքական գործիչը ստեղծված իրավիճակը բնութագրել է որպես իրականության խեղաթյուրում՝ ընդգծելով, որ ներկայացված հանգամանքների պայմաններում գործի իրավական հեռանկարները խիստ կասկածելի են։ Նա նաև հարց է բարձրացրել առկա փաստերի համատեքստում անձին կալանքի տակ պահելու իրավական հիմնավորվածության վերաբերյալ։

Սուրենյանցի խոսքով՝ եթե անձին ազատությունից զրկելու բավարար հիմքեր չկան, կալանքը փաստացի վերածվում է պատժի՝ առանց դատարանի վերջնական վճռի։ Նա մտահոգություն է հայտնել նաև հնարավոր ճնշումների և ապօրինի գործողությունների առնչությամբ՝ Ծառուկյանի գործը որակելով որպես քաղաքական հետապնդման և սեփականության նկատմամբ ոտնձգության աղաղակող օրինակ։

Առանձին անդրադառնալով իշխանության ղեկավարի հրապարակային հայտարարություններին՝ Սուրենյանցը նշել է, որ Նիկոլ Փաշինյանն իր ճեպազրույցներում պարբերաբար անդրադառնում է ընդդիմության ներկայացուցիչներին, այդ թվում՝ Գագիկ Ծառուկյանին։ Նրա գնահատմամբ՝ նման հայտարարությունները կարող են հակասել անմեղության կանխավարկածին, քանի որ Ծառուկյանը ներկայացվում է որպես հանցագործ՝ նախքան դատարանի վերջնական որոշումը։

Գագիկ Ծառուկյանի գործով դատական առաջին նիստը նշանակված է հոկտեմբերի 15-ին՝ ժամը 14։00-ին։ Գործը քննելու է դատավոր Մանվել Շահվերդյանը։

Սուրենյանցն ընդգծել է, որ դատավորի գործունեության վերաբերյալ տարբեր գնահատականներ են հնչել։ Նրա պնդմամբ՝ եղել են դեպքեր, երբ դատավորը կայացրել է գործադիր իշխանության շահերին համապատասխանող որոշումներ։ Քաղաքական գործչի կարծիքով՝ եթե այս գործով առկա լինի իշխանության միջամտություն կամ որոշակի ակնկալիք, դատավարության ընթացքը կարող է պայմանավորվել նույն տրամաբանությամբ։

Սուրենյանցը առաջիկա դատական նիստը կարևոր փորձություն է համարում դատական համակարգի անկախության տեսանկյունից։ Նրա գնահատմամբ՝ նույնիսկ եթե նիստի ընթացքում խափանման միջոցը չփոխվի, դատավարության ընթացքը կարող է ավելի հստակ ցույց տալ գործի քաղաքական բնույթը։