«Դպրեվանքը պետք է լծվի հոգևոր և մտավոր մարդ կերտելու սրբազան առաքելությանը»․ Արամ Վեհափառ

Բարի գալուստի խօսք արտասանեց Դպրեվանքի տեսուչ Գերապատիւ Տ. Պարոյր Ծ. Վրդ. Շէրնէզեան։ Հայր սուրբը անդրադառնալով Դպրեվանքի առաքելութեան՝ ըսաւ, որ մեր ազգի դիմագրաւած տխուր տագնապներուն դիմաց, Դպրեվանքը նախաձախնդիր կերպով կը լծուի վերանորոգ առաքելութեամբ պատրաստելու հոգեւոր եւ ազգային այն մարդը, որ լուծումներ պիտի տայ մեր ազգին ու եկեղեցիին առջեւ ծառացած մտահոգութիւններուն եւ մարտահրաւէրներուն։

Ապա, Արամ Ա. Կաթողիկոս, հայրապետական սիրով ողջունելէ ետք Դպրեվանքի տեսչութիւնն ու ուսուցչական կազմը, առաջին հերթին, իր գնահատանքը յայտնեց հոգեւորական թէ աշխարհական ուսուցիչներուն՝ յիշեցնելով, որ ուսուցչութիւնը առաքելութիւն է, յատկապէս հայ կեանքէն ներս, որովհետեւ հայ դպրոցը ի՛նք հայկերտումի ու մարդակերտումի առաքելութեան լծուած նուիրական կառոյց է։ Խօսելով Դպրեվանքին մասին՝ Վեհափառ Հայրապետը վեր առաւ անոր հոգեմտաւոր դաստիարակութիւն ջամբելու իւրայատկութիւնը։ Նորին Սրբութիւնը ըսաւ, որ Դպրեվանքի աշակերտները պէտք է պատրաստուին ժամանակին հետ քայլ պահելով եւ այնպիսի նկարագրով, որով Դպրեվանքը ճանչցուած է մեր ժողովուրդին կողմէ։ «Յատկապէս այս տագնապալից օրերուն, մեր ժողովուրդի զաւակները կը նային Մեծի Տանն Կիլիկիոյ Կաթողիկոսութեան։ Դպրեվանքը ա՛յս բծախնդրութեամբ պէտք է լծուի հոգեմտաւոր մարդը կերտելու սրբազան առաքելութեան» ըսաւ Հայրապետը։ Այս առիթով, ան կոչ ուղղեց ուսուցիչներուն առաւել նախանձախնդրութեամբ ու խստապահանջութեամբ կատարելու իրենց վստահուած պատասխանատու եւ սրբազան առաքելութիւնը։

Յայտնենք, որ Վեհափառ Հայրապետին տնօրինումով, տեսուչ հայր սուրբին իբրեւ օգնականներ, տեսչութեան մաս կը կազմեն փոխ տեսուչ՝ Հոգեշնորհ Տ. Գէորգ Վրդ. Գարակէօզեան, հսկիչ՝ Հոգշ. Տ. Ազատ Աբղ. Ֆիլիքեան, ընդհանուր հսկիչ՝ Կարպիս Գապասագալեան եւ տեսչական կազմի օգնական՝ Բարեշնորհ Մինաս Սրկ. Ճանսզեան»։