Գրեթե շաբաթ չկա, որ չլսենք հերթական ողբերգության մասին. Դանիելյան

ԱԺ նախկի պատգամավոր Գառնիկ Դանիելյանն ընդգծում է՝ բանակում մահվան և ինքնասպանությունների դեպքերը խիստ մտահոգիչ են․

Այս ամենը լուրջ ահազանգ է, որ ոլորտում համակարգային փոփոխությունների հրատապ անհրաժեշտություն կա։ Այլ պետություններում նման իրավիճակը կհանգեցներ պատասխանատուների, այդ թվում՝ պաշտպանության նախարարի, պաշտոնավարման նպատակահարմարության հարցի բարձրացման։

Զինվորի կյանքը վիճակագրություն չէ, իսկ բանակում մարդկային ողբերգությունները  անլուրջ մեկնաբանությունների թեմա չեն։

Յուրաքանչյուր նման դեպք պահանջում է մանրակրկիտ և անաչառ քննություն, պատճառների բացահայտում և պատասխանատուների հստակեցում։ Մինչդեռ իրավապաշտպանների պնդմամբ՝ այս հարցերում քննությունների անաչառության և արդյունավետության հետ կապված լուրջ խնդիրներ կան։

Այլևս անթույլատրելի է պաշտպանության և անվտանգության ոլորտում տիրող բարձիթողի վիճակը։ Այս իրավիճակն ունի հստակ պատասխանատուներ, և նրանց պաշտոնավարման շարունակությունը պետք է դառնա հանրային ու քաղաքական լուրջ քննարկման առարկա։

Ինչպես մյուս ոլորտները, այնպես էլ պաշտպանության և անվտանգության ոլորտը պետք է ազատել ձեր ձախողված կառավարումից։ Խաղաղություն բառը շահարկելով՝ դուք միայն մահեր եք բերում։ Ձեզ համար մարդկային կյանքը, այդ թվում՝ մեր երիտասարդ տղաների, որևէ արժեք չունի։ Դրա վկայությունն է նաև հանրային վայրերից մեր հերոսների նկարները ջնջելը, Փառքի անկյունները վերացնելը»։