Ռուսաստանը անտեսեց 44-օրյա պատերազմի դասերը. քաղաքագետ Տարաս Կուզիո

Քաղաքագիտության պրոֆեսոր, «Կիևո-Մոհիլայի ակադեմիա» ազգային համալսարանի դասախոս Տարաս Կուզիոն EU Reporter կայքի համար հոդված է գրել, որում զուգահեռներ է անցկացրել 2020 թվականի 44-օրյա պատերազմի և Ռուսաստանի՝ Ուկրաինա ներխուժման միջև։

Հեղինակի կարծիքով՝ Ադրբեջանի հաղթանակը ցույց տվեց ժամանակակից ռազմական տեխնոլոգիաների, առաջին հերթին՝ անօդաչու թռչող սարքերի նշանակությունը, սակայն Ռուսաստանը անհրաժեշտ հետևություններ չարեց այդ փորձից։

«2020 թվականի պատերազմի ժամանակ Հայաստանը անօդաչու թռչող սարքեր չուներ։ Ռուսաստանն անտեսեց 44-օրյա պատերազմի դասերը, և երբ Կրեմլը սկսեց լայնածավալ ներխուժումն Ուկրաինա, այն նույնպես անօդաչու թռչող սարքեր չուներ։ Արդյունքում Ռուսաստանը ստիպված եղավ դիմել Իրանի օգնությանը», — գրում է Կուզիոն։

Հեղինակը նշում է, որ Ադրբեջանը 2020 թվականին հաղթանակ տարավ, մինչդեռ Ուկրաինան 2022 թվականից պատերազմ է վարում Ռուսաստանի դեմ՝ կիրառելով ժամանակակից ռազմական գործողությունների մեթոդներ։

«Ադրբեջանը 2020 թվականին հաղթանակ տարավ, իսկ Ուկրաինան 2022 թվականից հաջողությամբ վարում է XXI դարի պատերազմ ռուսական զինված ուժերի դեմ», — ընդգծում է նա։

Կուզիոն Ադրբեջանի և Ուկրաինայի ռազմական հաջողությունները կապում է սպաների պատրաստման, զինված ուժերի բարեփոխման և ժամանակակից սպառազինության, այդ թվում՝ տարբեր տեսակի անօդաչու թռչող սարքերի կիրառման հետ։

Հոդվածում անդրադարձ է կատարվում նաև Թուրքիայի դերակատարությանը, որը ավելի քան մեկ տասնամյակ ՆԱՏՕ-ի չափանիշներով պատրաստել է ադրբեջանցի սպաների։ Կուզիոյի խոսքով՝ տարեկան զորավարժությունները, որոնց մասնակցել է առնվազն 10 հազար զինծառայող, օգնել են Ադրբեջանին խորհրդային հրամանատարական համակարգից անցնել արևմտյան չափանիշների։